Foreigner kaihhnawih sumdawnna lamah inkaihhruaina khauh dawn

Lawngtlai district huamchhungah foreigner nena kaihhnawih sumdawnna kawngah inkaihhruaina fel tak siam a ni anga, chumi chu khauh taka kenkawh tum a ni tih bawrhsap Donny Lalruatsanga chuan a sawi.
Thawhtanni khan Lawngtlai bawrhsap hian 2026- 2028 atana Central Young Lai Association office bearers a kawm a. Sawrkarin a kalpui mek ruihhlo do (Operation Jericho ) leh kawng dangah thahnemngai taka thawhpui turin a sawm a. Sawrkar department-ten hmalakna tha tak an neihna turah CYLA chu a daitheutu pawimawh tak an ni, tiin, ram leh hnam tana thawhpuiah a sawm a. Ruihhlo do kawngah CYLA hnuaia Drug Reduction Squad chak zawka hma la zel turin a beisei tih a sawi a ni.
Foreigners chungchangah hmalakna tur tam tak a awm tih a sawi a. Sumdawnna kawngah SOP felfai tak siam a tul hle tiin, hemi kawngah hian inkaihhruaina khauh taka kalpui a ni dawn tih a sawi. Hetah hian Central YLA chu thawhpuiah a sawm a ni.
Central YLA atangin president F Lalrothanga leh general secretary JH Lalrindika ten thu an sawi a. District hmasawnna atana bawrhsap hmalakna tha chu thlawp tlat an tum thu an hrilh a ni.