Africa-a mihringa sumdawnnaa bul tumtu man

Africa-a mihringa sumdawnnaa bul tumtu man
Ethiopia-a police-te chuan kum 2018 atanga Europe-a kal theih inbeiseia mi sang tam tak Libya-a hruai luttu, dollar maktaduai tam tak inrawlhna mihringa sumdawnna lian taka a hotu lawk nia an hriat an man.
Yetbarek Dawit-a hian Libya-ah hian detention warehouse panga a enkawl nia sawi a ni a, chuta lutte chu an chhungte hnenah pawisa pek belh tura nawr nan a hrem thin a ni.
Police-te chuan a thawhpui nia sawi mi pakua nen hmar lama Shire khuaah man a ni tih an sawi a. Court-ah thubuai siamsak an la ni lo.
Police-te chuan tun thlenga mi inpuanna an lak lkhawm atangin an pawl inzar pharh hi mi 100 chuang thihna leh hmeichhe 50 chuang mipat hmeichhiatna lama tihduhdahnaa inrawlh an nih thu an sawi.
Ramri kân chhuina hautak tak kalpui a nih hnuah man an nih thu police-te chuan an sawi a. An chhuinaah hian pawl pakhat, Africa khawchhaka dan lova sumdawnna kalpuitu inzar pharhte do tura din, European Union pawhin a puih, Regional Operational Center (Rock) pawh an tel.
Tigray hmarchhak biala awm, Eritrea leh Sudan ramri bula awm, Shire-a an man hnua mipa pasarih leh hmeichhia pathum thlalak hi Ethiopian Federal Police Facebook page-ah tar lan a ni.
Mi hralhtute hian Djibouti, Eritrea, Ethiopia, Kenya, Somalia leh Sudan atangin Libya-ah kawng hrang hrangin thalai 3,000 chuang an phur khawp nia sawi a ni.
Police-te chuan Yetbarek-a hi khawvel huap pawha zawn mek a ni a, hming hrang hrang a hmang a. Sudan-ah Adhanom, Djibouti leh Somalia-ah Ahmed, Kenya-ah Munir, Sweden leh Europe ram dangah Kibrom tih a ni.
A hming lemte nen hian chhuitute chuan technology changkang hmangin an zawng chhuak niin police-te chuan an sawi.
Yetbarek-a leh a thawhpuite bank account chu khawih chet theih lohva dah a nih thu leh an pawl thil neihte pawh laksak a nih thu an tar lang bawk.
Ethiopia, Libya, Netherlands, Switzerland, UK leh Canada-a cheng, thi nia sawi mi 100 chuang leh an chhungte hnen atanga thusawi an hmuhte pawhin chhuinaah hian a pui niin police-te chuan an sawi.
Libya-a warehouse-a an tantirte hi pawisa tam zawk thawn turin an chhungte an biaktir thin a. Pawisa pe thei lote chu ni khatah vawi khat chauh ei tur an pe a, hrehawm an tawrhtir thin nia sawi a ni.
Rubber, tiang leh electric hrui hmanga vuak te, an kut leh kea thir khaidiata an thlun te, an taksaah plastic rawt sar fartir te pawh a tel nia sawi a ni.
Hmeichhiate chu mipat hmeichhiatna lama tharum thawhna an tawk nia sawi a ni a, hei hian taksa leh rilru lamah hliam na tak a tuar bawk.
Heng thil an thil tihna atang hian an pawl hian $ mtd 19 chuang an lalut nia rin a nih thu police chuan an sawi.
Tigray-a an man hnuah, mi 10-te hi Thawhtanni khan khawpui Addis Ababa-ah hruai an ni.