BJP dal zawngin ZPM pen ngam lo – MPCC president

ZPM sawrkar chu BJP dodal zawngin ke a pen ngam loa, tuna opposition party lian ber MNF pawhin an dodal ngam chuang lo tih Congress hruaitu Lal Thanzara chuan a sawi.
Thawhtannia Congress Bhavan-a inkhawmah MPCC president Lal Thanzara chuan, MNF chu official-in NDA-ah a tel a, ZPM chu official takin NDA-ah tel lo mah se, inthlan dawna sum rawn finance-tute BJP an nih avangin ZPM sawrkarin BJP dodal zawngin ke a pen ngam loa, hma an la ngam lo tih a sawi.
“Hengte avang hian kan ramin lei malsawmna kan dawn loh phah niin a lang. Congress party hi engtikah mah BJP nen sam inphiar zawm ngai lo tur party kan ni,” a ti.
Central-a Congress sawrkarin a duan chhuah, thingtlang lama an hman tangkai em em MGNREGA pawh BJP sawrkarin her danglamin , tunah chuan thil a harsa dawn hle niin a sawi. “Hemi atana inziah luh ni atan Chawlhni an rawn ruat a, nakinah phei chuan Chawlhnia inhlawh turten an la rawn ti hialin a rinawm. Heti chung hian sawrkar lai ZPM leh opposition party lian ber MNF ten an dodal ngam chuang reng reng lo. Kan ram kan hnam kan sakhua a himna tur chuan Congress party lo chu India ram pumah leh kan state-ah hian an awm lo,” Lal Thanzara hian a ti.
Education department-ah induhsakna hlei hluak tak a awm avangin Congress Thalai-in duhlohna an lantir a. Education minister-in street campaign-a a thusawiah Congress party chu beih thamah pawh an ngai lo a ti, nia sawi chhawngin, “Education minister hi a chanchin chanchinbua kan hmuh chinah a hnathawh that aiin a chanchin mawilo zawng ziah leh hmuh tur a tam zawk a. Pa fel tak a ni chung hian a department enkawl hi a hneh vak lo em ni chu tih tur a ni,” a ti.
Congress chu ngaihsan tham an awm loa, an ruhrel lian viau mah se an opposition rei deuh tawh tih MPCC president hian a sawi a. Chutih rualin hmun hrang hrangah member an nei thar zel a. Hei hi an theih vangte, an chak vangte ni loin, Pathian a hruaina zawk a ni tih a sawi. AMC inthlan pawh Pathian hnena innghat chungin an hmachhawn dawn tih a sawi.