Corruption do duh chuan BJP mai ila – Dr K Beichhua

Corruption do duh chuan BJP mai a, development duh chuan Prime minister Modi hnung zui mai bawk chu Mizoram-in kan tih tur dik tak a ni tih State BJP hruaitu Dr K Beichhua chuan sawi.
Thawhtannia State BJP office-a inkhawmah BJP Mizoram president Dr K Beichhua chuan, India ram sawrkar kaihruaitute hi an fakawm em em a, India Prime minister hlui Atal Bihari Vajpayee chu PM a nih laiin miretheite hma ngai scheme dintu, Tribal Affairs department dintu leh hmarchhak states 8 enkawlna tur bik DoNER pawh a hunlaia duan a ni, tiin, NE-a chengte leh tribal state-te tunhmaa hnuchhawn state-te chawikan a, India ram ropui tak din chu an tum a ni tih a sawi.
“Vawiinah chuan Prime minister Modi vangin India chu khawvela ram pawimawh ber zing ami a ni ta a, ram hrang hrang hian India thawhpui loh an hlau tawh. Chuvangin PM Modi hnung zui hi a zahthlak loh a, Mizoram mipui kan inngaihtuah chian a ngai hle. BJP-ah hian a englai hi nge kan hlauh a, Modi hnung kan zui hian enge hlauh tur awm, tih ka ngaihtuah a. Corruption kan do duh chuan BJP mai ila, development kan duh chuan Pu Modi hnung zui mai bawk ila, chu chu kan tih tur dik tak a ni,” a ti.
Mizoram-in enge kan mamawh ber, tih chuan intodelh a ni, tiin, intodelhna tur kawng pawimawh tak chu Pu Modi zui a ni tih a sawi. “Kan budget aiin kan leiba a tam zawk a, chuti chung chuan sum min pe theitu kan hlau tlat thung a,” a ti.
Congress party-in Hindu party ni anga an puh tlat chu, Congress party an fihlim bik em, tih zawtin BJP Mizoram hruaitu chuan, Congress hruaitute chu Kristian party ni bik lo, an hruaitute pawh Hindu tho, Sonia Gandhi pawh Kristian atanga Hindu-a inpe zawk a ni tih a sawi.