High Court-ah RTI enkawltute inkhing

Tun hnaiah Right to Information (RTI) hmanga thil dilte’n harsatna an tawk fo a, a diltute chauh ni lovin RTI enkawltute pawhin harsatna an tawk a ni a, court-ah thu a lut.
Mizoram Health Care Society-in Mizorama RTI lama thuneitu sang ber Mizoram Information Commission an khing a, April ni 22 khan Gauhati High Court – Aizawl Bench-ah ngaihtuah tan a ni.
Mizoram Health Care Society hian High Court-ah hian motion an pu lut a, Nilaini khan High Court chuan Health Care Society thu leh hla hi a ngaithla. Court-ah hian Health Care Society aiawhin Mizoram sorkar advocate general a ding a ni.
J Malsawmzuala’n Mizoram Health Care Society-ah Mizoram Universal Health Care Society hnena Synod Hospital, Durtlang nena an inremna thuthlung a dil atanga he case hi intan a ni.
Nikum November ni 1 khan RTI hmangin a dil a, an pek theih loh avangin Information Commission-ah a zualko a, Information Commission chuan April ni 9 khan hearing neiin, a thil dil chu April ni 17 hmaa pe turin thu a titlu a ni.
Mizoram Health Care Society hian April ni 20 khan ngaihtuah nawn leh turin Information Commission hi an ngen a, mahse Information Commission hian RTI danah ngaihtuah nawn leh theihna a awm loh thuin a chhang. Chumi hnuah Mizoram Health Care Society chu High Court-ah an kal ta a ni.
He thubuaia hi sorkar leh sorkar inkhinna a ni a, Mizoram Health Care Society-in Mizoram sorkarin court-a ding tura a rawih advocate general an ruai a, Information Commission pawhin ukil an rawih ve a ngai dawn a, sorkar hnuaia mi an nih avangin an ukil rawih man chu sorkarin a tum a ngai dawn.
April ni 22-a motion put luh a nih hnuah Information Commission thu leh hlate ngaihthlak a ni ve leh ang a, RTI hmanga zawttu pawh court-ah hian a inlan a ngai dawn.