Malaria tamna ber Mizoram
Mizoram chu mihring chet zat azir zela chhutin India ramah malaria vei tamna ber a ni mek a, tunhnai kum hnih chhungin thihpui 13 an awm bawk.
April 25 kha khawvel pum huap Malaria Dona Ni – World Malaria Day a ni. World Health Organisation hnuaia World Health Assembly chuan kum 2007 khan malaria (sikserh) chungchanga inzirtirna leh hriat tur tul inhrilhhriat thinna hun atan World Malaria Day hi hman a rel a. Kum 2008 atang khan kumtin thupui neiin April 25-a hman thin a ni a, kumin thupui chu malaria tih bo ngei ngei tuma bei tura infuihna lam – “Driven to End Malaria: Now We Can, Now We Must” tih a ni.
National Health Mission hnuaia National Vector Borne Disease Control Programme (NVBDCP) sawi danin, Mizoramah malaria natna a la hluar hle a; tun dinhmunah India ramah mi sang khat zel atanga malaria vei hmuhchhuah zat (annual parasite incidence) atanga chhutin malaria tamna ber state a ni. Mizoramah hian kum 2024 khan malaria vei mi 16899 awmin, mi 7-in nunna an chan phah a. Kum 2025-ah malaria natna vei mi 9328 an awm a, nunna chan 6 an awm. Kumin January atanga March chhunga malaria hmuhchhuah tawh zat chu 666 niin nunna chan an la awm lo.
Hei hian malaria do kawnga tan lak kan ngaih nasat zia a lantir tih an sawi a ni.
Kum 2024-ah India rama malaria vei hmuhchhuah zat mi 255500 niin, 86-in nunna an chan phah a. Kum 2025-ah malaria vei hmuhchhuah 233555 atangin nunna chan 55 an awm. India ramah hian hmarchhak state bakah Andhra Pradesh, Chhattisgarh, Gujarat, Karnataka, Madhya Pradesh, Maharastra, Odisha, Tamil Nadu, Uttar Pradesh leh West Bengal chu malaria tamna hmun a ni.
He ni denchhen hian Mizorama district zawng zawngah malaria dona atana hmalakna hrang hrang kalpui niin, khawtlang mipui leh pawl hrang hrang nen malaria chungchang inzirtir a nih bakah ‘source reduction drive’ (thosi pian theihna tui tling tihbo hnatlang), lo/ huan neitute malaria laka an lo him theihnan ruahmanna siampui leh school zirlaite nen hun hman ho a ni. Malaria tamna district-a maxi cab leh lirthei lian hoah malaria laka him leh invenna tur poster bel a ni bawk.