Ramri kaihhnawihah Union MoS nen state sawrkar hotute inkawm
Ramri kaihhnawihah Union MoS
nen state sawrkar hotute inkawm
Union minister of state for Home Affairs Bandi Sanjay Kumar chuan Mizoram a rawn tlawh a. Sawrkar hotute leh Assam Rifles hotute chu ramri kaihhnawih a sawipui.
Home kaihhnawih state sawrkar hotute nen an inkawmnaah Union minister of state chuan hmun hla tak atangin harsatna leh mamawh ngaithla tura lokal a ni a, inthlahrung loa Mizoram hmasawnna atana an vei leh ngaihpawimawh sawi turin a chah.
Home secretary David Lalthantluanga leh Agriculture & Farmers’ Welfare secretary Ramdinliani ten power presentation pe in an department hnuaia centrally sponsored scheme kalpui mek an sawifiah a. An hlawhtlinna bakah harsatna an tawh leh a sutkian dan tur an sawifiah nghal bawk.
Hemi hnu hian sawrkar department aiawhten an department hnuaia hmalakna, harsatna leh mamawh an sawi a. Union MoS hian report kimchang taka siam a, a hnena thehlut turin thurawn a pe a, a tul ang anga bawhzui a nih tur thu a sawi.
Border Security Force leh 23 Assam Rifles deputy inspector general ve ve ten Mizoram depa India ramri – Myanmar leh Bangladesh a venhimna kenkawh dan, ramri hung chungchang leh Vibrant Villages Programme kaltlanga ramri depa thingtlang khuate tihchangtlun dan tur an report a. Sawrkar official-te pawhin khualzin hip tam lehzualna atana hmalak dan tur, India ram pawn atanga khualzin lo lutten Restricted Area Permit/ Protected Area Permit-a harsatna an tawh sutkian sak a tul thu, sector hrang hranga Mizoram dinhmun leh Vikshit Bharat 2047 dungthula Mizoram tihhmasawnna tur – ‘Transformed Mizoram Vision 2047’ atana ruahmanna leh tihhlawhtlin tul sawiho a ni bawk.
Sawrkar mipawimawhte nen an inkawm hnu ah Bandi Sanjay Kumar hian Mizoram Police Headquarters Khatla tlawhin GS Arya Mess-ah Mizoram Home minister K Sapdanga nen an inkawm a ni.
Inkawmnaah hian Mizoram sawrkar officialte hi chief secretary mawhphurhna chelh lailawktu R Zarzosanga’n hoin Mizoram DGP bakah sawrkar department – Home, Planning, School Education, Agricultuture & Farmers’ Welfare, Horticulture, Commerce & Industries, Excise & Narcotics, Finance, Transport, Prisons bakah Health & Family Welfare, PWD, Tourism, Forensic Science Laboratory hotute an tel a ni.