Sawrkar thuchhuah lem siamtu man

April 27-ah sawrkarin chawlh a puang ni awma thu phuahchawp siama tidarhtu chu chhuizuia man a ni a, thubuai siamsak a ni.
Thawhtanni zing khan ruahsur avangin sawrkarin chawlh a puang ni awmin thu a darh a. Office memorandum lem pakhat (No. F-23012/36/2025-ESTT-CSD ni 27 April 2026), General Administration Department-in ruah sur nasat avanga sawrkar chawlh a puanna ni awm tak chu social media lamah thehdarh niin, mipui a ti chiai nasa tih sawi a ni.
He document lem darhah hian GAD additional secretary Irene Zohlimpuii Chongthu hming a chuang a, GAD deputy secretary Ch. Lalnunkima’n digital signature-in a sign hnan angin a lang a ni.
Hemi chungchangah hian GAD under secretary Christina Lalmuanzuali chuan Cyber Crime Police Station-ah dan anga hma la tura ngenin FIR a thehlut a. A ngen angin thubuai ziahluh nghal niin, rang leh uluk taka chhui zui a ni. Document lem siamtu hi darkar 24 liam hmain chhui chhuah a ni a. April 28 khan sawrkar thuchhuah lem siama vawrh darhtu Lalramhlua (kum 18) Upper Republic Aizawl chu man a ni.
Mizoram Police hotute chuan, sawrkar document siam danglam emaw siam chawp leh theh darh emaw hi dan kalh tlat a ni a, hetiang thil lakah hian fimkhur hle turin mipui an chah tih an sawi. Lo inhnamhnawihte chungah dan anga na taka hma lak zel a ni dawn, tiin, Mizoram Police chuan social media – Facebook, Instagram, Whatsapp adt. hmanga kan thil thawn darhah fimkhur lehzual tur leh thudik finfiah hmasa thin turin mipui an ngen tih an sawi a ni.