Khaw 25 huam Green-Ag project

Mamit district bawrhsap Suvigya S Chanda hoin Thawhlehni khan Green -Ag project leh line department hrang hrang thawhhona tur ‘convergence thutkhawm’ neih a ni a. Green -Ag Technical Support Group (TSG) chairman ni bawk bawrhsap hian Mamit district a Green-Ag hmalakna hrang hrang a hlawhtlin theihnan line department nen inpawh taka thawhho zel a pawimawh tih a sawi a ni.
Thutkhawmah hian agriculture leh a kaihhnawih line department ho an tel a. Mamit district-a Green -Ag project huamchin khaw hrang hranga hna thawhho dan tur sawi a ni.
EF&CC department nen ramngaw humhalh kawnga thawhhona tur, AH & Vety department nen a ranvulhtute hamthatna tur – livestock insurance leh vaccination kawnga hmalakna tur, Fisheries department nen sangngha dil siamna tur leh Agriculture & Farmers’ Welfare leh Rural Development department tanghoa hmalakna tur sawi a ni bawk. School Education department nen environment humhalhna kawnga zirna ina thawh dun dan tur te rel a ni bawk.
Green-Ag project hian Mamit district-ah khaw 25 huamin, heng khua hi Dampa Tiger Reserve bulhnai ami an ni a, ‘Dampa Landscape’ tih a ni. Lunglei distric-ah pawh Thorangtlang Wildlife Sanctuary chhehvela khaw 13 huamin, ‘Thorangtlang Landscape’ tih a ni. Kumin April 9-a TSG thutkhawmah Mamit district-a hmalakna tur, Annual Work Plan & Budget (2026- 2027) Rs. 15,286, 305 chu pawm a ni tawh a ni.