Hmun 6-ah heroin kg.1 chuang man

Mizoram Police chuan hmun hrang hrang parukah heroin a vaiin kg. 1.649 an man a, he thila inhnamhnawih engemawzat an man bawk.
April 26 khan Saitual Police Special Team chuan Keifang khaw daiah lirthei veivak endikin heroin gram 480 (hawng 40) chu Santro car AS 11 C 3280 atangin an man a, car khalhtu Sultan Ahmed Laskar (35) Cachar district Assam hian Manipur atangin Mizoramah lo lutin Silchar pan tum a ni. Thudawn danin, ‘Mokaddil’ tia a sawi, Assam lam mi chuan heroin lei tur hian cheng nuai 6 a kentir a, ruihhlo nena a rawn haw lam chu Police-te hian an lo man ta a ni. He thilah hian Saitual Police Station-ah thubuai ziahluh a ni.
April 25 khan Saitual Police Special Team bawk hian Keifang khaw daiah tho lirthei an endiknaah Abdul Solam Barbhuiya (27), Cachar district Assam khalh 407 truck AS 08 A-6584 atangin heroin gram 479 (hawng 30) an man a, a ni hi Ngopa lam atanga Aizawl lamah, Assam pan tura chhuk lam a ni. Saitual PS-ah thubuai ziahluh a ni.
April 24 khan Champhai Police chuan Chalbawia Junction Khankawn Check Gate-ah maxi cab pakhat atangin chuang zing ami Thangrokhawli (42) Senvawn Manipur, tuna Zemabawk Aizawl nia insawi hnen atangin heroin gram 308 (hawng 26) an man a. Heroin hi Bulfek Myanmar atanga an lak niin, a lakpuitu Robert Lalramchhuana (30) Champhai Vengthlang pawh chhui chhuaha man nghal a ni. Chhui chhunzawmna atangin he ruihhlo kalzelna tur Rothangpuii (62) Bawngkawn Durtlang Road pawh hemi ni vek hian Bawngkawn Police puihnain man a ni bawk.
April 24 khan Khawzawl Police chuan Neihdawn Junction-ah scooty Access MZ 01Y 5626 tidingin endik an tum a, a khalhtu Lalremruata (40) Dinthar Veng Khawzawl chu tha taka inpuangin a ruihhlo ken, heroin gram 22 chu police hnenah a hlan. Chhuizuina atangin he ruihhlo lo dawngtu tur Zodinpuii (59) Arro Veng Khawzawl pawh man a ni a. Khawzawl PS-ah thubuai siamsak an ni.
April 23 khan Ngopa Police Station Team chuan Ngopa Police Check Gate-ah random checking an nei a, Bolero MZ01 AB 6301-a chuang Tinneithem Kipgen (30) Monglenphai Manipur hnen atangin heroin gram 351 an man. Ngopa PS-ah thubuai ziahluh a ni.
April 21 chawhnu dar 2.20 khan Special Narcotics PS Team chuan Kelsih khuaah Linda Lallawmzuali (30) Kanan Veng Aizawl inti hnen atangin heroin gram 9.330 an man a, thubuai an siamsak a ni.