Bangladesh-a palai atan politician Trivedi-a ruat nghet ta

India chuan Bangladesh-a an high commissioner thar lo atan politician hlun tak, Dinesh Trivedi a ruat ta a, hei hi New Delhi-in a khawchhak thenawm ram nena inzawmna siam that a tumna kal zelin foreign service officer ni lo palaia a ruat erawh thil thleng ngai lo tak a ni.
Inthenawm ramte hi mipui lungawi lovin Bangladesh prime minister hun rei tak lo ni tawh, Sheikh Hasina-i kum 2024-a paih thlaa New Delhi-ah a tlanchhiat atang khan an inmil lo zui hle a. Trivedi-a palai atana ruat a ni hian China-in sumdawnna leh thil danga a hnaih hret hret karah India-in Bangladesh nena inrintawnna siam that a tumna nia ngaih a ni.
Kum 75 mi, Trivedi-a hi railways leh health minister hlui a ni a, kum 2021 khan Prime Minister Narendra Modi-a kaihhruai BJP chu West Bengal-a regional party atangin a zawm a, he state hi India leh Bangladesh inzawmnaah hmun pawimawh tak a ni a, Modi-a party pawh hian tun laia assembly inthlan an neih mekah pawh thuneihna chan ngei tuma nasa taka a beihna hmun a ni.
Indian external affairs ministry chuan Trivedi-a chungchanga thuchhuah siamin, “Rei lo têah he hna hi a thawk tan tura beisei a ni,” a ti.
Ram pahnihte inlaichinna hi February thlaa inthlanpuia Bangladesh Nationalist Party hruaitu, Tarique Rahman-a’n thuneihna changa sorkar a din atangin a tha leh tan a. Hasina-i sorkar paih thlak hnuah sorkar lailawk khan China lam an hawi nasa hman a ni.
Bangladesh hi Britain-in a awp hun lai khan India ram chhunga tel thin a ni a, kum 1947 khan British thuneihna tawp rualin East Pakistan a ni ta a. New Delhi hian kum 1971 khan Bangladesh chu Pakistan atanga zalenna a hmuh theih nan a pui zui leh a ni.
Bangladesh foreign minister chuan tun thla khan Delhi a tlawh a, Indian hruaitute chu tuialhthei leh lei tihthatna pek tihpun, energy lama thawhhona tha zawk leh zin khapna tihziaawmna tur lam a sawipui a. Hetih lai hian ram pahnihte mutan lian ber chu India-in tun thlenga Hasina-i a mikhual a hlan let duh rih loh chu a ni.