Result quality thup hi a pawi – NSUI Mizoram

HSLC leh HSSLC exam-a top 10 leh division bakah abstract thlenga thup a ni chu pawi an tih thu NSUI chuan an sawi.
National Students Union of India Mizoram State thuchhuak chuan, MBSE-in tluang taka HSSLC result a tichhuak thei leh tha taka a kalpui chu fakawm a tih thu a sawi a. Zirlai pass tharte an lawmpuiin, an hmalam hun atana pawimawh, career thlanfelna hun a nih tawh avangin an zir zel dan tur pawh uluk taka thlang turin an chah tih a sawi. Chutih rualin, exam pass ve ta rih lote pawh beidawng loa theihtawp chhuah zui turin an chah tih a sawi bawk.
MBSE-in HSLC leh HSSLC result a tihchhuah takah tunhma anga top 10 tarlan a ni ta lo mai niloin, result khaikhawmna (abstract) ah takngial pawh result quality, division hrang hranga pass zat mipui hriat theih loh tura kalpui a ni ta chu pawi a tih thu sawiin, ‘Pass percentage a that chuan kan lawm ringawt mai dawn nia lang hian kan zirna quality a tih hniam kan hlau hle a. Zirna sang zawk chhunzawmna kawngah zirlaite hi pass ringawt loa, division tha tak, percentage sang taka an pass ngei theihnan hma la a, inelna thianghlim siam a ngaih lai a, result quality ber thup a ni tlat hi a pawi kan ti hle,’ a ti.