Mizoram Rural Bank-in Pro Volleyball League thawhpui

On Apr 30, 2026 1 0

Management Committee nen inremna siam felin hmasawn mek Mizoram Rural Bank chu a vawi khat nan Pro Volleyball League title sponsor a ni dawn.
May ni 11 khian LPS Arena, Falkland-ah Pro Division mipa team sarih leh hmeichhe team li telna Mizoram volleyball inelna sang ber tan a ni dawn a, Mizoram Rural Bank Pro Volleyball League tiin a hming phuah fel a ni.
September ni 27, 1983 khan Mizoram Rural Bank din a ni a, MINECO, Aizawlah office pui ber neiin Chairman Pi Sheryl L Vanchhong hnuaiah hma lam an pan mek a, branch 106 hawng tawhin Aizawl leh Lungleiah regional office pakhat ve ve an nei.
Branch hrang hrang khawpuiah 26, khaw lian pangngaiah 20 leh thingtlangah 60 hawng tawhin, an hnuaiah a ngheta thawk mi 489 an awm a. 2025-26 pawisa kum chhungin anmahni dawrtuten sum cheng vaibelchhe 6,526.10 dah lutin sum che vel cheng vaibelchhe 10,656.08 a tling a, hlep vaibelchhe 4,129.98 nei phakin kum hmasa aiin 10.61%-in a pung.
Mizoram Rural Bank hian hma lam pan zel tura hma an lakna kawngah Mizo thalaiten hma an sawn phah ngei beiseiin mipui ngaihhlut hlawh tak Pro Volleyball League an thawhpui theih avangin lawmawm an ti hle a, mi dangte tana luang chhuahna pawimawh takah an ngai bawk.
Anni bakah D3 Business Enterprise, Orient Goldsamith leh EverHome House of Furniture chuan nikum ang bawkin championship an sponsor leh a. Inkhel apiangah Kuriz Player of the Match lawmman sem a ni dawn a, kum dang ang bawkin mi mal chawimawina, championship chhunga player tha leh coach thate hnenah lawmman pek a ni bawk ang.
Pro Volleyball League vawi kuana atan kawng hrang hrangin inbuatsaihna kalpui mek a ni a. May 2, inrinni chhun dar 12-ah Hawla Indoor Stadium Conference Room, Republic Vengthlangah fixture leh handbook tlangzarh a ni dawn.
A vawi khat nan champion tumin Tuichangral mipa team-in Sri Lanka atangin Swiss League player Mahela Indeewara an la lut dawn a, Khawbelin Tuipuiral leh Hunthar spiker hlui Anurag Rawat an biak fel tawh bakah Sihphirin nikuma an hman tawh Niyas Abdul Salam an la lut leh dawn bawk.