Goal 9 luhna inkhelah PSG an chak

Thawhlehni zan khan UEFA Champions League semi-final thawh khatna khelh a ni a. Parc de Princes a inkhel hmuhnawm tak; goal 9 ngawt luhna inkhelah champion lai Paris St Germain in an mikhual Bayern Munich chu 5-4 in an hneh. Semi-final a PSG leh Bayern Munich te intum hi final tluk zeta hmuhnawm a ni a, Allianz Arena-a an inkhelh hun a nghahhlelhawm nghal hle nghe nghe a ni.
Paris St-Germain khelmualah Parc de Princes-ah mikhual team Bayern Munich an huangtau hle a, goal pawh an thun thuai. Goal thun tuma na taka an innawr karah Bayern Munich tana khel tha tei tak Luis Diaz chuan minute 17-naah penalty a hlawhchhuak. He penalty hi season kal meka goal thun thei tak Harry Kane chuan awlsam takin a pet goal a, hmahruaina goal a thun.
Goal thun hmasa zawkah Bayern an tang hi inkhel tihmuhnawm lehzualtu a ni a, an si phurh sut tuma PSG tankhawh a hmuhnawm thei hle a, si pawh an phur rei lo. Minute 25-naah tun laia winger tha ber pawl Khvicha Kvaratskhelia chuan goal thunin an si phurh a sut. He goal hian PSG a fuih phur leh zual a, goal pawh an thun belh leh thuai. Player hmuhnawm tak João Neves chuan minute 33-naah hma an hruai letna goal a thun.
Hma an hruai let vangin phur viau mah se PSG an phur rei thei bik lo. Quarter-final atanga Real Madrid hnawtchhuaktu Bayern Munich in an si phurh sut ngei tumin tan an khawh a, champion lai PSG an hlau bik der lo. Na taka an khingpuite nawrin hun tha an hmu a, a khelh that theih vanga club lian hrang hrangin an awh em em Michael Olise chuan nalh zeta a khalh tlang hnuin tha zetin a pet goal a, minute 41-naah goal thunin an si phurh a sut.
Chawlhlawk dawn hnaihah Olise-a’n goal thun mah se an la duh tawk mai lo. PSG in penalty an hmu zui leh a, mimal chawimawina sang Ballon d’Or leh Best Fifa Award dawng kawptu Ousmane Dembélé chuan minute 45+5-ah penalty a pet goal a, hma an hruai nawn lehna goal thunin PSG hian 3-2 a hmahruai chungin chawlhlawk an hmang ta nge nge.
Chawlhlawk hmaa goal nga ngawt a luh vangin inkhel hmuhnawm tak a ni tawh a, chawlhlawk hnu lamah goal li ngawt luh belh lehin inkhel a hmuhnawm zui zel. Tunlai team tha pahnih PSG leh Bayern Munich te inkhelah zet chuan goal a lut zawih zawih a, inkhel en a manhla tak zet zet.
Chawlhlawk hnu lamah PSG in bul an tan tha tak zet a, goal hnih an thun belh thuai. Second half tan atanga rei lo minute 56-naah an goal hmahruai thuntu Khvicha Kvaratskhelia chuan an goal lina thunin an hmahruaina a tizau. Goal thuna an hmahruaina an tihzau belh vangin PSG an phur tak zet a, Bayern Munich an talbuai ve thung. An khingpuite talbuai zuai lai chuhin PSG hian na takin an mikhualte an nawr a. Khvicha Kvaratskhelia goal thun atanga minute hnihna lekah Ousmane Dembélé chuan an goal ngana a thun zui leh cheu a. German champion Bayern Munich lakah 5-2 ngawta hma an hruai vangin PSG hian semi-final an hnaih hman viau tawha ngaih a ni.
Champion lai PSG lakah si thum ngawt phurin buai hman viau mah se German ral a lian nawn leh a, Bayern in team huaisen an nihzia an lantir nawn leh. Vincent Company enkawl Bayern hian an si phurh sut ngei tumin tan an khawh thar hle a, defender Dayot Upamecano chuan minute 65-naah hnaite atanga tauh goal in an si phurh a sut then.
Goal an thun vanga phur thar leh Bayern Munich tan hian Liverpool player hlui Luis Diaz chuan ball thiam bik a nihzia a lantir nawn leh a. Chiang zeta Marquinho a bum hnuin chiang zetin minute 68-naah a pet goal a, an goal lina a thun. Bayern hian an si phurh sut zawh tumin tan an khawh zui nasa viau a, goal bar tihper bawk mah se goal an thun belh thei tawh lova, PSG lakah uiawm takin an tlawm zui ta a ni.
PSG leh Bayern Munich te hi kar leh thawhlehni zan khian Allianz Arena-ah an inhmachhawn zui leh dawn a, inkhel hmuhnawm tak a ni leh ngei ang. Goal thun thiam team an ni ve ve a, goal a luh leh nual a rinawm.