Season tawp hmaa Salah kir hman an beisei

Liverpool chuan kumin nipui insuan huna Anfield chhuahsan ve tawh tur Mohamed Salah inhliam dinhmun tharlam tarlangin, season kal lai tawp hma ngei hian an chhawr leh hman an beisei thu an puang.
Karliamta Inrinni khan Crystal Palace an hmachhawn tumin Egyptian hian hliam a tuar a, kaihza tha hliam ni tura rin avangin second half-ah khelmual a chhuahsan a, kha game kha tun season-a a game hnuhnungber tur a nih tawh mai rinna a pian nghal laiin season kal lai zawh hma ngeia a thiamna leh theihna an chhawr leh hman hram an beisei ngam ta a ni.
Kum kua zet Reds thuam a inbel hnua Anfield atanga inpuchhuak ve tawh tur Salah hi tunah kum 33 mi ni ve tawhin, thla hmasa mai khan Liverpool a chhuahsan ve tawh tur thu hi a puang a; hliamin a tlakbuak tak avangin he club-a a tawpna chu lungchhiatthlak viau dawnin a lang hman a, mahse, hliam dinhmun enfiahna eng atangin lawman leh beiseina an nei chho leh ta a ni.
Nilaini khan Liverpool chuan thuchhuah an siam a, tihrawl hliam tenau (minor muscle injury) a nih thu leh Egypt international chuan a club vawn lai a chhuahsan hma ngeia khelmual a luh leh theih rinna an neih thu an sawi.
English Premier League campaign kal laia an game hnuhnungberah May ni 24 khian Liverpool chuan an khelmual hman thiam Anfield ngei maiah Brentford an mikhual dawn a, tah hian Salah a dam hman a nih chuan a tan thlahna inkhel a ni nghal thei ang.
Tun season-ah pawh la inlan leh thei tura beiseina an neih ngam tak avangin June thla World Cup-ah pawh hian a captain-na hnuaia Egypt an inlan theih beiseipui phawt ang!
Kum 2017-a Liverpool a zawm hnu khan Salah hian Premier League title pahnih bakah Champions League, Fifa Club World Cup, Uefa Super Cup leh FA Cup pakhat theuh bakah EFL Cup pahnih leh Community Shield a lakpui tawh a, Anfield club-a a career hi pui ve tham tak a ni!
Liverpool tan game 435 khela goal 257 thun tling tawh Salah aia he team tana goal khung hnem awmchhun pahnihte chu Ian Rush (346) leh Roger Hunt (285)-te chauh niin, Palace an tum tuma hliam avanga khelmual a chhuahsan hnuah a chhuah hma ngeia goal dang thun belh turin ‘chance’ nei leh turah ngai phawt ang!
Campaign kal lai zawh hma ngeia a kir hman beisei ngam chauh a nih avangin Pathianni zana Liverpool-in Manchester United an luhkhung hunah hi chuan Old Trafford-ah an forward inhliam hi hmuh tur a la awm hman lo tura ngaih a ni.
May ni 9 khian Liverpool-in Chelsea an mikhual dawn a, May ni 17-ah Aston Villa luhkhungin, an league game hnuhnung ber May ni 24-ah Brentford an tum dawn a, khawi match ber hi nge Salah kir theih hun tur tih hriat theih a la ni lo.