Arsenal in UCL final an lut

On May 7, 2026 2 0

May 5, Thawhleh zan khan UEFA Champions League semi-final thawhhnihna khelh a ni a, Emirates Stadium-a inkhel hmuhnawm takah Arsenal chuan 1-0 a Atletico Madrid hnehin final an lut. Gunners hian Bayern Munich leh Paris St-Germain te inkhela chak zawk zawk an hmachhawn zui leh dawn a. Vawi khat an chak leh a nih chuan Champions League-ah a vawi khat nan Golden Trophy an dawng dawn.
English Premier League-a table chung ber luah mektu Arsenal leh Spanish La Liga club lian Atletico Madrid te hi semi-final thawhkhatnaah 1-1 in an lo inhnehtawk tawh a. Semi-final thawhkhatnaa an goal thun hi penalty aTanga an thun ve ve a ni. Mimualah tlawm an pumpelh vangin Arsenal tan final luh theihna kawng a inhawng zau leh zual a. An mualah ngei harsa taka hnehna hlu changin final an lut ta nge nge a. Kum 20 hnuah UCL final an lut leh ta chiah a, champion tumin Tan an khawh zui hle ngei ang.
Emirates Stadium-ah Arsenal leh an mikhual Atletico Madrid te fimkhur takin an inlan. Atletico Madrid hi tlarhnung ven thiam tak an ni a, forward an neih That bawk vangin khelh an har a, fimkhur taka hmachhawn an ngai. Arsenal ve thung hi UCL season kal meka goal chhuah tlem ber leh clean sheet ngah ber an ni a. Player an nei Tha rual em em bawk nen tutan mah zuam chi an ni lo. Champions Season kal mekah tlawm nei lo awmchhun an ni leh zel bawk a, beisei lawk ang ngeiin an mualah an khel Tha hle nghe nghe.
Arsenal manager Mikel Arteta chuan EPL-a an hmachhawn hnuhnung ber Fulham laka a chhawr ngai player te bul a Tantir a, thlak danglam a nei lo. Gunners hian ngam tak si, fimkhur takin an mikhualte an nawr a, ball an chang tam viau naa goal thun theihna hun Tha erawh an nei tam thei bik lo thung. Atletico Madrid nawr let a hlauhawm viau zel a. Arsenal in an hnena khel tura an awh em em Julian Alvarez-a’n hlauhawm chang nei bawk mah se a tam zawkah a lang lo viau thung. Inkhel hmuhnawm takah goal lut a awm theih loh reng hnuin chawlhlawk dawn hnaiah Arsenal in goal an thun ta nge nge. Leandro Trossard shot Tha tak chu si nghak Jan Oblak chuan dang hman mah se ball per let leh hi Bukayo Saka tan pet nuam tawk chauhin a tla a. Saka hian minute 44-naah awlsam takin a pet goal a, hmahruaina goal a thun. Saka goal thun hmang hian 1-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm leh zual. Goal an chhuah tawh vangin Atletico Madrid in an goal an veng thei ngawt tawh bik lova, na zawkin an khingpuite an nawr a ngai tawh. Mikhual team in goal thun tuma Tan an khawh vangin inkhel a hmuhnawm leh zual a, goal thun tumin an innawr tawn nasa hle. Atletico Madrid in hlauhawm an siam a, goal thun theihna hun Tha an neih chu khelh Tha tak Declan Rice leh defender Gabriel Mangalheas ten an tihthlawnsak a. Madrid team hian penalty hmuh beisei viau mah se an hlawhtling zo lo bawk. Arsenal pawhin goal thun belh ngei tumin Tan an khawh a, khel Tha zet, Atletico Madrid tlarhnung tana hnawksak em em Viktor Gyokeres chuan goal thun teuh viau mah se goal chungah a pet chhuak a, a hun Tha neih a hlah ve bawk. Inkhel hmuhnawm tak hi goal lut awm belh lovin a tawp a, Arsenal chuan si belhkhawmah 2-1 a Atletico Madrid hnehin an club chanchina a vawi hnih nan Champions League final an lut.
Golden Trophy a hnai
Atletico Madrid hneha final lut Arsenal hi UCL season kal mekah an khel Tha viau a, final an luh thlengin tlawm an la nei miah lo. Tlawm nei lovin khelh 14 chhung an kaltluang ta chiah a, Champions League-ah hetiang ti thei hmasa ber an ni. May ni 30 khian Hungary khawpui Budapest a Puskás Aréna-ah final khelh a ni dawn a. Final-ah an chak a nih chuan champions league ah a vawi khat nan tlawm nei miah lova champion hmasa ber an ni ang a. UCL a champion tawhte trophy dawn ang Thin ni lo Golden Trophy an dawng dawn. Golden Trophy an dawng a nih ngat chuan a hlu dang dai bik khawp ang.
Gunners hian Golden Trophy dawng thei turin hna hautak tak an thawh a ngai dawn thung. Final-ah Bayern Munich emaw PSG emaw zawk zawk pawh tum se anni hi team Tha zet mai an ni a, final boruak sangah phei chuan hneh an har hle dawn. Season liam ta khan UCL semi-final ah PSG hi an lo hneh lo tawh a. Hetihlai hian Bayern Munich hi chu season kal mekah hian an lo hneh tawh thung. Hnehtu tawng lo an ni miau a, Arsenal hian rin an kai hle.
Semi-final hnuhnung zawk hi nizan khan Allianz Arena-ah khelh a ni a. UCL Semi-final hmuhnawm berah ngaih lo chhawpchhuak tawhtu Bayern Munich leh PSG te an intum nawn leh.