Tui chhunga mihring inchherchhuan sang ber

Andaman and Nicobar Island chuan tui chhungah India flag lian zet mai pawtpharhin, tui chhunga flag pawtpharh lian ber record an lo siam tawh a, a tuk lawkah record dang, tui chhunga mihring inchherchhuan sang ber record an siam leh ta a, meter 22.3 a sangin an inkokichhuan. Hetah hian mi 14 an inkokichhuan a, chung zingah chuan Lieutenant Governor D.K. Joshi pawh a tel. Mi 14 te hian an hnuaia ding te koki-ah rapin, an ding zel a, a chung berah an Lieutenant Governor hi India flag kengin a awm ta a ni. Tui chhungah hian minute thum chhung an inkokichhuan a, tui chhunga mihring inchherchuan sang ber record an siam ta a ni.
He record siamna hi Andaman and Nicobar administration leh Indian defence force Tangkawpin an buatsaih a ni a, Swaraj Dweep (Havelock Island tih Thin kha)-a tui chhungah record hi an siam a, mi 14 inkokichhuan zingah hian an Lieutenant-Governor, Islands Development Agency-a Vice Chairman ni bawk pawh hi a tel ve a ni.
Andaman and Nicobar Island hian a hma lawkin tui chhunga India flag 60×40 meter a lian an lo zarpharh tawh bawk a, a tukah record dang hi an siam leh ta a ni.
Andaman thuneitute chuan hetianga record siam lam an buaipuina chhan chu khawvel huap pawh tui chhunga luh lam thil (diving) tihna hmun hriathlawh leh khualzin ten an tlawhpawh nasat lehzual theihna tura an inphochhuahna pakhat niin an sawi a, Andaman and Nicobar Island hi scuba diving leh eco-tourism lamah a hming a thang lehzual ngei dawn a ni.