Pension rawih nawn sut turin MZP-in huntiam pe

Mizo Zirlai Pawl chuan Mizoram sawrkarin a hnuaia hnathawk pension tawh a rawih nawn chu May 14 (Ningani) ralhma ngeia sut turin sawrkar thuneitute a ngen tih a sawi.
MZP Gen. Hqrs. thuchhuak chuan, Mizoram sawrkar hnuaia hnathawk pension tawh rawih nawn (re-employ) tunhnaia awm chungchangah, tunhma atangin MZP chuan pensioner rawih nawn hi nasa taka dodalin, duh lohna lantir a lo ni tawh thin tih a sawi a. Tuna pensioner chungchangah pawh MZP ngaihdan a la ngai reng tih sawiin, ‘Sawrkar hnathawk ruai nawn lo tura thuneitute kan ngen reng lai a, MZP ngenna ngaipawimawh loa, sawrkarin a ruai nawn hi Mizoram mipui leh thalai hna zawng mekte zah lohna leh hmusitnaah a ngai a. Pension rawih nawnna order hi May 14 ralhma ngeia sut turin sawrkar thuneitute kan ngen a ni,’ a ti.
Sawrkar hnathawk pension rawih nawn awm fo thin chu tunhma atangin tha a tih loh thu auchhuahpuiin, pension tawh rawih nawn an nih avanga bang tura nawr pawh a lo nei tawh thin tih MZP hian a sawi a. Chutiang thil thlen ngai lo chuan thuneitute pawh a tul anga hma la turin an ngen tih a sawi. Sawrkar hnathawkte chu an hnathawh hun chhunga thahnemngai taka thawk tura ngenin, an pension hnuah erawh thalai hna zawng mekte kian turin a duh takzet tih a sawi bawk.