Trump-a’n ‘Project Freedom’ titawp, inremna a hnaih thu sawi

Trump-a’n ‘Project Freedom’ titawp, inremna a hnaih thu sawi
Donald Trump-a chuan Strait of Hormuz kaltlanga lawngte kaihruai tura hma a lakna, ‘Project Freedom’ chu rei lo te hnuah titawpin Iran nena ‘Complete and Final Agreement’ siam turin hmasawnna a awm thu a sawi a, hei hian tuialhthei sumdawnna a tha zawngin a nghawng a, hmasawnna beiseina a tisang hle bawk.
A hnu rei lo teah beisei hi US president vek hian a tireh leh nghal thi bawk.
Iran chuan Washington atanga rawtna thar awm an ennawn mek tih a sawi a, US chanchinbute chuan American thuneitu, a hming tar lan chuan Gulf-a indona titawp turin ram pahnihte hian phek khat awh memorandum an siam chu an pawm tep tih a sawi tih an tar lang.
Pakistan-a palaite hnaih taka awm chuan Reuters news agency hnenah, “Kan tifel thuai dawn a. Kan hnaih chho zel,” a ti bawk.
Hetih lai hian Thawhlehni tlaia Truth Social-a ‘inremna siama ziah fel thuai’ tur a ni em tih ngaichanga Project Freedom a tihtawp thu a tar lan hnu darkar eng emaw zatah Trump-a hian khaw hawi a thlak leh nghal thung.
Nilaini tuk khan Iran nena inremna chu ‘rawtna lian tak’ a nih thu sawiin, an inrem loh chuan ‘a hma aia na leh nasa sang zawkin’ bomb a puak chhunzawm leh dawn tih a sawi a ni.
President-in hetiang vauna a tihchhuah hi US Secretary of State Marco Rubio-a’n White House-ah American sipaiten Iran-a beihpui an thlakna, Operation Epic Fury chu a tawp tawh tih a sawi atanga darkar 24 pawh tling lo a ni.
Axios leh Reuters chuan Washington leh Tehran hian indo tihtawp nan phek khata sei, point 14 nei memorandum pawm an hnaih tawh hle niin an lo tar lang tawh a ni.
Ruahmanna hian indona tihtawp a tum dawn nia sawi a ni a, hemi hnu hian Strait of Hormuz khar hawn lehna tur te, hrekna hlih leh Iran-in nuclear ralthuam neih a tumna tihtawp dan tur sawiho zui a ni ang.
Hetih lai hian Axios chuan US thuneitu thenkhat zingah inremna siam theih dan tur ringhlel leh Iranian hruaitu pawl hrang hrangte zingah tuin nge pawm pawh ni ang tih rinhlelhna nei an awm niin a tar lang.
Iran-a National Security & Foreign Policy Commission thupuangtu, parliamentarian Ebrahim Rezaei-a chuan X-ah Axios-in point 14 a tar lan chu US ‘duh dan vek’ a nih thu a tar lang a. American-ten ‘a tul anga ngaihhnathiamna an pek’ loh chuan Iran chuan ‘silai cheng a kau reng a, a inpeih’ tih a sawi bawk.
Trump-a hian vawi tam tak Iran-in US thil phut a pawm thu a sawi a, April 7-a inkahhai puan a nih atang khan inremna siam hnaih a nih thu a sawi bawk.
April 17 khan CBS hnenah Iran chuan ‘engkim a pawm’ tih a sawi a, US chu a uranium tihchak lak chhuah a phalsak dawn tih a sawi a, Tehran-a thuneituten an hnawl nghal vek thung.
Nilaini khan Oval Office-ah Trump-a chuan, ‘Inremna siam an duh a, inbiakna neih an duh,” tiin a sawi chhunzawm leh bawk.