Ngen anga siamthat loh chuan NH 102B dan tum

Mizoram leh Manipur inkalpawhna kawngpui, National Highway 102B huamchhung Ngopa chhehvela kawngpui siam danah khawtlangin an ngenna thlen tih hlawhtlin a ni loa, May 14 thlenga ngaihsak a hlawh loh chuan total bandh leh tiamchin awm loa kawng dan zui thlengin an tintuah mek.
Joint Action Committee on NH 102B Package-2 Ngopa thuchhuak chuan, he kawng siam mekah hian hna a chhiain a nih tur ang a ni lo hle niin a sawi a. Compensation hnawl chungchang, khaw chhung kawng peng hrang hrang laih chhiat siamthat leh loh, kawng zau zawng a nih tur ang tling lo lutuk, hmanraw hman chhe lutuk leh thil dang tam takah a nih tur ang a ni lo nasa tih a sawi.
Hemi chungchanga hma laksak tur hian NHIDCL, contractor leh chief secretary hnenah ngenna siam a ni tawh thin a, awmzia a nei lo hle tih sawiin, Ngopa khawtlang tangrual pawl – Joint Action Committee chuan May 13 thlenga an ngenna in awmzia a neih loh chuan, May 14 hian Ngopa khawchhungah total bandh huaihawt an tum a, chumi pawhin awmzia a neih loh chuan NH 102B hi tiamchin awm loa dan an tum tih a sawi a ni.