Serchhip MJA-in MIFCO hmun tlawh

MJA Serchhip District member-te chuan Nilaini khan Mizoram Food Processing & Allied Industries Corporation Ltd. Chhingchhip an tlawh.
Serchhip MJA hian an district chhunga sawrkar hmalakna leh hnathawh an tlawh kalzelah Chhingchhip-a awm MIFCO hmun hi an tlawh a. MIFCO chairman Lalthazuala Rawite chuan dawngsawngin an inkawma bakah thei leh thlai an sawngbawlna hmun leh MIFCO Complex-a inbun mek Ropuiliani Women Farmer Producer Company hmunhma an tlawh a ni.
MIFCO chairman chuan, hun engemaw chen thil siamchhuah mumal an neih tawh loh hnu in sawrkar thar atangin hma lak chhoh leh a ni a, nikum atangin hma la tanin kuminah theitui chi hrang hrang bakah baibing leh rawtuai/ mautuai tin siam (mass production) turin an inbuatsaih a, thawktu nei tlem tawh mah se, casual labour lak an tum a, thil siam chhuah hralhna lam pawh zau zawka kalpui an tum tih a sawi.
MIFCO Inspection Bungalow (IB) chei thar chu MJA Serchhip District president Kapliana Pachuau chuan a hawng nghal a ni.
MIFCO Chhingchhip hi kum 1998 khan hawn a ni a, theitui bakah mautuai leh baibing tin an siam thin. Tunah hian Ropuiliani Women FPC chuan aieng, sawhthing leh hmarcha sawngbawlin MIFCO hmunah hian an inbun a ni.