Zoramah English football thlipui

Nilaini leh Ningani vela social media-a thlalak lar tak pakhat chu, two wheeler taxi khalhtu pakhat, Arsenal jersey ha chunga tlan kha a ni ngei ang. Champhai Vengthlanga Arsenal tantute banner tar pawh a lar a, Lawngtlai-a mi pawh a lar. A dang pawh a awm. English Premier League-ah Arsenal an champion a, Mizoramah pawh rawng sen a lar!
Mizoram hian football a ngaisang a, football-in Mizoram a luh tirhah ngainat a hlawh nghal. TV awm hmain Mizoramin a tuipui fe tawh a, Mizo leh sipai inkhelin Lammuala leng lo mipui a koh khawmna a rei tawh.
1991-ah Mizoramah cable TV a thleng a, cable TV-in ram lak nana hmanrua a neih that chu football a ni. A hma chuan Bangladesh TV-ah Mizoram mipuiin football an en thin tlangpui a, Doordarshan leh Bangladesh TV-ah antenna hmangin World Cup te pawh an en thin. En tur a tam lo a, en tur a awm pawhin a fiah lo. Chutiang karah chuan cable TV-in Mizoram a thleng a, football an en nghal tia sawi ngam a ni.
Cable TV-ah English Premier League en tur a awm a, kar tawpa mipa inawm tleina pawimawh a tling ang. A lar telh telh a, hmeichhia pawhin an tuipui, a tuipui lo pawhin footballer larte hming chu an hre fur tho. Internet khawvelah pawh English Premier League a lar zui zel a, ram dang league pawh Mizoramah hian a lar tho, mahse English Premier League tluk chu a awm lo.
2003-04 season-a an champion hnuah 2025-26-ah Arsenal an champion a, Thawhleh zanah an champion tih hi a chiang. A tuk atangin Mizoramah Arsenal kawr rawng (a sen) a lar ta a ni. Khawvel club lar ni chungin an lo champion lo rei tawh bawk a, lawm au thawm pawh a ring.
Nilainiah two wheeler taxi khalhtu James Lianhmingthanga’n Arsenal jersey ha chungin a hna a thawk nghal a, “Kum 22 pawn tlai se a hunah a thleng,” tih thuziak a tar bawk (Arsenal hi kum 22 hnua champion leh an ni).
Ani hi 1999 vel atanga Arsenal tan tawh a ni a, an champion hnuhnun ber khan Arsenal tantu a ni tawh. Kum 22 hnua a pawlte an han champion chu a lawm hle. “Zing kar atangin message ka dawng nasa a, tichuan hna thawk tura ka chhuak kha, ka phur ngang a ni ang, tum lawk pawh awm lovin thuziak te kha ka tar ta a ni,” a ti a, “Mi pawhin min lawm khawp mai, min lo nuih var var zel. Min lo au te pawh an awm,” a ti bawk.
Champhaiah Gooners Champhai te’n hmun lun laiah Ningani khan banner an tar a, ni 22-ah a lawmna chaw hlui kil an tum. ‘Kum 22 hnua kan han champion leh hi kan lawm em a, theihtawpin kan lawm ve a ni,’ an ti.
Aizawlah chuan Nilaini khan Arsenal jersey a zo duak a ni awm e; Arsenal tantute duhkhawp a awm lo. Arsenal hi champion teuh deuh an ni kum tin a, tun season-ah pawh hian hma an hruai chungin jersey hi an lo lei lawk ngam lo te pawh a ni ang, an champion hnua lei chauh an thahnem tlat.