A tum lina atana World Cup khel tur Son

Tottenham Hotspur forward hlui Son Heung-min chu kumin World Cup khel tura thlan chhuah zingah tel ehin, South Korea captain hi ram tana World Cup vawi li khel tling chingah a hming nemkai a ni ve dawn ta a ni.
Kum 33 mi hian nikum khan Spurs chhuahsanin Major League Soccer side Los Angeles FC tan a khel mek a; coach Hong Myung-bo chuan experienced squad a thurchhuah zingah rin lawk ang ngeiin hmun a la chang.
He squad-ah hian tawnhriat nei tha tawh dang Wolves forward Hwang Hee-chan leh British-based midfielder rual khat Bae Jun-ho (Stoke), Paik Seung-ho (Birmingham), Yang Hyun-jun of Celtic leh Swansea star Eom Ji-sung hmuh tur an awm.
Anni bakah hian Paris St-Germain midfielder Lee Kang-in, Bayern Munich defender Kim Min-jae leh German-born defender Jens Castrop of Borussia Monchengladbach-te koh zingah telin, Castrop phei hi chu South Korea World Cup squad-a hnam hnih kaikawp awmchhun a ni nghe nghe.
Castrop-a pa hi German niin, Korean nu nei a ni a, age-group level-ah Germany tan khel zet mah se nikum khan a nu avanga a thlan theih South Korea tana senior level-a khelh a thlang a, tun thleng hian a ram duhthlan thar zawk tan match nga a khel tling tawh.
South Korea hian June ni 12 khian Czech Republic tum chungin World Cup campaign an tan dawn a; June ni 19 zanah co-hosts Mexico hmachhawnin, an game hmasa pahnih hi Guadalajara khawpuia khelh ve ve tur a ni a; June ni 25-a an group game tawp ber erawh South Africa nen Monterrey lamah an khel thung ang.