Bayern domestic double puitu Kane

Season tawp hma fein Bundesliga title a lakpui fel diam tawh a, Inrinni zan German Cup final-ah a hat-trick siam hmangin Harry Kane chuan defending champion VfB Stuttgart lakah si thum faia a team chakpui lehin tualchhung trophy lian pahnih lakpui chungin domestic double champion a nihpui.
England captain hian Berlin khuaa Olympiastadion-ah Munich player pawimawh a nihzia pholang nawn lehin, a goal hmahruai hi second half tir lama a tihluh a ni a, hun pangngai tawp hma minute 10 la awmah a goal hnihna khungin, hun pekbelh minute hnihnaah penalty atangin a lungthu kimna a chhuihlut zui leh a, kum ruk chhunga a vawi khatna atan Vincent Kompany team-in domestic double an hlawhchhuak thei ta a, German football-a an chungnunzia an pholang tel bawk.
Bayern Munich honorary president Uli Hoeness chuan Harry Kane-a transfer fuhzia sawiin, an club chanchina player lei fuh ber ti hialin a sawi!
Inrinni zan DFB Cup final hi fans lamin khelmual chhunga halmawi an hal nasat avangin a khaihlak zauh a, a bak chu Kane-a show a ni ber e!
Bundesliga champion tana goal thum khungtu Kane kha final match telin German Cup round tina goal khung kim vek thei pathumna niin, tun season inelna hrang hrangah belhkhawmin Bayern tan match 51-ah Tottenham striker Kane hian goal 61 tehreng a tilut tling!
Bavarians hi Champions League semi-final lamah Paris St Germain hneh loin tun thla vek hian an tla fel tawh a, treble champion an ni thei ta lo a ni.
Tarlan tawh thin angin, Bayern hian tun thla tir lamah Bundesliga title an kawl lai humhim fel tawhin, nikum August thla khan German Supercup an chawi tawh bawk a, tuna an champion leh nen Kane hian kum 2023 nipui thawt laia German giants a zawm hnu khan trophy pali a lakpui tling ta a ni.
Kumin hi Bayern Munich tan German Cup title 21 an lak tlinna chiah niin, kum 2019-20 kha he tournament-a an champion vawi khatna a ni.