US-in Iran a kap thar leh

US chuan Iran chhim lam an beih thar thu a sawi a, Iranian missile dahna hmun leh chilpuah bomb kam tum lawngte an bitum thu a sawi.
Thawhtanni zana beihpui thlakna hi ‘mahni invenna’ atana tih a ni a, “Iranian sipaite hlauhawmna laka kan sipaite venhimna atana ruahman a ni,” tiin US Central Command chuan a puang.
Central Command thupuangtu, Capt Tim Hawkins-a chuan ‘US sipaite chuan ram pahnihte inkara inkahhai mek lai karah kan sipaite an him nan hma an la zui zel’ tiin a sawi.
Iran hian US beihna hi a la chhang let lo va; mahse, Iranian foreign ministry thupuangtu, Esmail Baqai-a chuan a hmain indona titawp tura inbiaknain hmasawnna eng emaw zat a awm tawh laiin inremna siam chu ‘a hnai lo’ tih a sawi.
Capt Hawkins-a chuan US beihpui thlakna hian chhim lam lawng chawlhna khawpui, Bandar Abbas bula hmun a beih niin New York Times chuan a tar lang.
Iranian sorkar chanchinbute chuan a hmain Bandar Abbas-a tual chhung thuneituten puak ri an hriat hnuah an chhui mek niin an lo tar lang tawh bawk.
US leh Iran inkara remna siam tuma hmalaknaah eng nge a nghawng dawn tih a la chiang lo.
Beihpui thlak a nih hnu hian US Secretary of State Marco Rubio chuan inremna siam theih a la nih thu sawiin, Thawhlehni-a Iranian palai hotu, foreign minister leh Qatar Prime Minister inkara inbiakna neih a nih tur thu a sawi.
US leh Iranian sipaite hian April 8 atang khan inkahhai an kalpui a. Iran hian Gulf-a lawng kalna, Strait of Hormuz thununin US Navy-in Iran-a lawng chawlhhmunte a dang ve bawk.
US leh Israel tang dun chuan Iran hi February 28 atang khan beiin Middle East pumah buaina a awm phah a. Iran hian a chhan let nan Gulf-a Israel leh US thawhpui ramte a bei ve a, Strait of Hormuz a khar bawk a. Khawvel pumah tuialhthei man a san phah mek.