June 8-ah INDIA-a telte thukhawm dawn

India-a eptu tangrual pawl, INDIA hruaitu lawkte chu June 8 hian ram khawpui berah an thukhawm dawn nia sawi a ni a, BJP kaihhruai sorkar hmachhawn tur leh an pawl an inpumkhatna tihchak dan tur ruahmanna an siam dan tur an sawiho dawn nia hriat a ni.
Thutkhawm koh turah hian eptu party 15 vel aiawh tel tura ngaih a ni a. Tun hnaia assembly inthlanpui neihah West Bengal leh Tamil Nadu-a INDIA-a tel langsar pahnih, Trinamool Congress (TMC) leh DMK-te chu thuneihna atanga paih thlak an nih hnuah an thukhawm dawn a nih hmel.
Tel tur zingah hian TMC supremo leh West Bengal chief minister hlui, Mamata Banerjee, Shiv Sena (UBT) hruaitu Uddhav Thackeray, Samajwadi Party President Akhilesh Yadav, Congress hruaitu Rahul Gandhi leh President Mallikarjun Kharge te pawh an tel nia sawi a ni.
Congress-in DMK nena an inzawmna a tihtawp a, TVK a pan tak avangin DMK chu thutkhawmah hian a tel a rinawm loh thu sawi a ni a. Tamil Nadu Chief Minister C Jospeh Vijay-a kaihhruai TVK chu pawh luh tuma hmalak mek a nih thu sawi a ni bawk.
Aam Aadmi Party (AAP) chuan vantlang hriatah tangrual pawl nen an inhnaih tawh tawh lo tih an sawi tawh a, Constitution Club-a thutkhawm neih tura ruahmanah hian an tel a rinawm loh.
Thutkhawm hi eptu party-ten inremna thuk zawka kalpui tumna anga ngaih a ni a, a bik takin tun hnaia assembly inthlanpui neih zawh hnuah leh state eng emaw zatah politic vir vel danglam zel karah tanho ngheh lehzual dan tur dap an tum nia ngaih a ni.
Banerjee-i hian Bengal-a TMC hruaitute beih nia sawi chungchang a sawi chhuah a rinawm a, INDIA-a tel party-te thlawpna a beisei a rinawm.
Indian National Developmental Inclusive Alliance (INDIA) thutkhawm hnuhnung ber hi Lok Sabha inthlan hma lawk, June 1, 2024 kha niin New Delhi-ah a ni.
August 7, 2025 khan Gandhi-a chuan New Delhi-a a chenna inah INDIA hruaitu lawk tak takte tan zanriah buatsaihin an thukhawm leh bawk a, he hunah hian eptu party 25 chuang atanga hruaitu 50 vel an tel a, hetah hian inthlan dan kalphung tihdanglam nia sawi, a bikin Bihar-a voter roll-a Special Intensive Revision (SIR) chungchang an sawiho deuh ber.
Hemi hnuah pawh hian INDIA hruaitute chu parliament session hmain an inrawnkhawm bawk a, eptu party-te chuan rorelna ina an tando dan tur leh sorkar laipui do zawnga thawhhona tha tak an neih turte an sawiho.
Heng zingah hian Chief Election Commissioner Gyanesh Kumar-a chet dan sawi chhuahah paih thla tura ngenna pawh a tel.
Tun hnaia assembly inthlan result-in eptu pawlte zingah thawhhona siam that duhna hi a nasa zual a. Kum 2024 Lok Sabha inthlanpui neih hma khan INDIA tangrual pawlah hian eptu party eng emaw zat an tel a, BJP kaihhruai NDA chu ram pum huapa tangruaa do an tum a ni.