France-ah IAF chief, Rafale 114 leina tur tifel thei hnai

France-ah IAF chief, Rafale 114 leina tur tifel thei hnai
Indian Air Force (IAF) Chief Air Chief Marshal Amar Preet Singh-a chu France-ah ni li cham turin a zin mek a. India-in Rafale 114 lei tura hma a lak mek lai niin IAF chanchina iindo thlawhna lei tumna lian ber zinga mi a ni.
Defence ministry chuan India hian Rafale lei turin France-ah rawtna a thawn tawh a, Paris hian a man, siam chhuah theih zat leh a inpek dan tur chungchang a lo hrilh dawn a. Thla hnih atanga thla thum chhungin chhanna pek an nih beisei a ni.
Hemi hnu hian ram pahnihte inbiakna tan a ni ang a. Thuneitute chuan kum khat chhungin inremna tihfel theih a nih an ring.
IAF chief-in France a tlawh hi intlawhna satliah a ni lo va, France-a defence company lian hotute a kawm rin a ni a. Heng zingah chuan Rafale siamtu, Dassault Aviation leh Meteor leh SCALP ang chi advanced missile siamtu MBDA te pawh an tel.
Sawihonaah hian thlawhna lei mai ni lovin India-a siam, technical thila thawhho leh India-a rem khawmte pawh a tel thei bawk.
Prime Minister Narendra Modi-a pawhin June thla laihawl velah France a tlawh ve mai thei bawk a. Hei hi a thleng a nih chuan Rafale inremna hi a sawi tur pawimawh zingah a tel ang.
Thlawhna inleisak tura inremna hi sorkar leh sorkar indawrna hmanga kalpui a nih avangin ram pahnih hruaitute hian chanvo pawimawh tak an neia ngaih a ni.
IAF hian squadron 42 a nei thei a; mahse, tunah hian squadron 29 chauh a nei thung a. MiG-21 ang thlawhna hlui zawkte tihtawp a nih hnuah a tlachham rih viau a. Hei vang hian kawng hrang hranga chhawr thei indo thlawhna thar 114 nei tura ruahmanna siam a ni a. Thlawhna lei turah hian Rafale hi a buk rit ber a ni a, IAF hian 36 an lo lei tawh a ni.
Inremna siam tura rawtna langsar tak awm tel chu India-a siam chhuah dan dap ve a ni. Thlawhna 114 zinga 94 chu India-a siam theih a ni a, a dang erawh France atanga lak tur a ni ang.
India-a siam ve tur hian Dassault Aviation hi India company nen an thawhho a ngai dawn a. Defence ministry chuan he project-ah hian 50% vel tual chhunga kalpui a duh a, Indian system leh ralthuam eng emaw zat chu thlawhnaah dah tel theih a ni dawn tihna a ni a. Make in India leh Atmanirbhar Bharat hmalakna atana lian tak anga ngaih a ni.
Rafale chungchanga India leh France thawhdun hi thil thar a ni lo va. Kum 2016 khan ram pahnihte hian Rafale jet 36 siam turin inremna an ziak a, hei hi India-ah thlen vek a ni tawh a. Ambala leh Hasimara air base-ah dah a ni.
IAF-in Rafale 36 a neih mek bakah hian Indian Navy tan Rafale-M jet 26 siamna tur inremna pawh ziah fel a ni tawh bawk a. Thlawhna 114 siam tura inremna hi kalpui a nih chuan India hian a vaiin 176 a nei dawn a. Hei hian India chu van sangah a theihna a tipung thei dawn a, China leh Pakistan ramri-ah pawh a theihna a tipung dawn bawk a ni.