Osaka hneha last 8 lut Sabalenka

Osaka hneha last 8 lut Sabalenka
French Open khelh mekah a hmei-a-paa Roland Garros champion tawh dek dekte an tlak fai hnua women’s singles champion thar hlak ni thei tura beisei pahnih inbeiah Thawhtanni zan khan Aryna Sabalenka chuan 7-5, 6-3-a Naomi Osaka hnehin claycourt Grand Slam quarter-final a lut.
Ti hian, Belarusian Sabalenka hian major tournament a khelh hnuhnung tum 14-ah quarter-final tal a la thleng kim vek a, kumin hian a la champion ve lohna French Open-ah hian kum dang zawng aiin a beiseiawm chho dawn ta niin a lang!
Tun kha kum thum chhunga Roland Garros zan lam hmeichhe inkhel kan hmuh hmasakber niin, Japanese Osaka tan French Open fourth round match a khelh vawi khatna a ni ve bawk.
Hnehna a sualchhuah hnuah Sabalenka chuan a tumpui fakin, player ropui a nih thu leh tumpuite nawr tlat chi a nih thu sawi chungin chuti chunga Osaka a nawrlet ve thei kha a lawmzia thu hahipin a sawi a; fans lam hawi zui nghalin, an hmuh laia zan lam match khelh chu nuam leh pui dangdai a tih thu a sawichhuak.
World number one hian a serve tha tak avanga a hlim erm em thu leh a khelh dan chu khaikhawmin a lungawithlak a tih thu a tarlang tel.
Thawhtanni zan vek khan Diana Shnaider leh Anna Kalinskaya-te paw’n major champion ni tawh ve ve barakhaih chungin quarter-final an lut.
Russia Shnaider hian set hnihna hloh zet chungin American Madison Keys lakah 6-3, 3-6, 6-0 hnehna a chang a, kumin claycourt Grand Slam kal meka major champion laka ‘upset’ kan hmuh mawlh mawlh zinga a hnaivai pawl a ni.
Fourth round inkhel dangah pawh Russian nula bawk chakin, Anna Kalinskaya chuan a tumkhatna atana French Open quarter-final a luhna ni turin 28th seed Anastasia Potapova lakah 6-4, 2-6, 7-6(7) hnehna a chang nawlh a, Grand Slam bika he stage a chuankai vawi khatna a ni.
Roland Garros-a tualchhung hmeichhe player dam awmchhun ni chunga inlan Diane Parry lakah Polish qualifier Maja Chwalinska chuan 6-3 6-2 hnehna changin, French mipui tana chang han tum theihna awmchhun chu Thawhtanni French Open khelhna hmuna an ram football club lian Paris St Germain player pahnih Ousmane Dembele leh Bradley Barcola-te’n mipui hmuh tura Champions League trophy an kawl pahnih phochhuah kha a ni ta mai e!
Inrinni zan final-ah champion lai PSG khan penalty petah Arsenal hnehin Europe club competition lian ber title an kawl lai an humhim a, chu trophy leh a hma kum chiaha an title lak chu clay-court grand slam tournament entute hmuh turin an phochhuak a ni.