Kawrthah North VC-in ram pum huapah pakhatna a la

Sawrkar laipui Ministry of Panchayat Raj buatsaihin Nilaini khan New Delhi-ah National Panchayat Awards Ceremony – 2026 programme hman a ni a. Mizoram atangin Kawrthah North Village Council chuan intihsiakna category pakhat, Deen Dayal Upadhyay Panchayat Satat Vikas Puraskar hnuaiah lawmman an dawng.
India rama panchayats/ village council zinga ram pum huap lawmman (National Panchayat Award) hmute chawimawina leh lawmpuina a buatsaihah hian Union minister of Panchayati Raj Rajiv Ranjan Singh chuan category hrang hranga award dawngte hnenah lawmman – trophy leh certificate a hlan a; minister of state for Panchayati Raj Prof SP Singh Baghel chuan lawmpuina leh fuihna thu a sawi a ni.
Mizoram atanga Localization of Sustainable Development Goals (LSDG) theme – 5 ‘Clean & Green Village’ category-a Deen Dayal Upadhyay Panchayat Satat Vikas Puraskar (DDUPSVP) lawmman dawngtu Kawrthah North VC pawh Union minister of Panchayati Raj hian an hlan a. Lawmman hian sumfai cheng vaibelchhe khat kengtelin Kawrthah North VC bank account-ah thunluh a ni. Hei hi khaw hmasawnna hna thawhna atana hman tura ruahman a ni.
Kawrthah North Village Council-in LSDG theme 5 ‘Clean & Green Village’ category hnuaia DDUPSVP lawmman pakhatna an dawng thei hi an khawtlang mipuiin sawrkar hmalakna hrang hrang tha taka an thlawp vang leh theihtawp an chhuah vang a ni tih sawrkar chuan a sawi.