Mi sang bawr khawm tawh

Ruihhlo do kum bawhzuiin Central YMA-in Aizawl khawlaia ruihhlo buaipuitu mi sang chuang an khawm tawh a, khawlai pawh a zia. A fai duak lai te pawh a awm a, mahse a fai tak tak thei lo ni chuan a lang.
Aizawl khawlaiah a duh tan zalen takin ruihhlo a zawrh theih a, a lei theih bawk. Hmun lun laite hi ruihhlo zawrhna hmun a ni hlawm a, Treasury Square leh Vanapa Hall bul velte a ngap thei hle. Mi sang chuang an khawm hnuah pawh a fai tak tak thei lo.
Ruihhlo do kum bawhzui tura din Central Anti Drug Squad (CADS) te’n 2025 kum tawp atang khan khawlaia ruihhlo khawihte hi an khawm a, May thla thlengin mi sang vel an khawm tawh. An zingah hian a ngai khawm nawn te pawh an awm a, mahse an tam lo an ti.
CADS hian counsellor an nei a, an mi khawmte hi ni nga chhung counseling an neihtir thin. An mamawh dan azirin ni nga aia tam kalte pawh an awm. Home-a dah leh excise departent kuta hlan tlem azawng an nei bawk.
An sawi danin, ruihhlo vanga an khawmah hian a tam zawk fe chu Aizawl ni lo khaw dang mi an ni a, chutiang chu 80% vel an nih an ring. Ruihhlo khawih turin Aizawlah an kal tawp mai a, a then phei chuan thlenna pawh an nei lo.
Khawlai a fai tak tak thei lo tih an sawi a, an indaih loh vang te, ruihhlo a hluar em avang te nia an hriat thu an sawi a, chhunah an ‘duty’ ngawrh thei lo a, chhunah hian ngawrh takin ‘duty’ thei se chu khawlai a fai lehzual an rin thu an sawi.