Civil Hospital leh ZMC-ah chatlak loa power neih dan tur ngaihtuah

Civil Hospital leh ZMC-ah chatlak
loa power neih dan tur ngaihtuah
Mizorama damdawi in lian pahnih – Civil Hospital Aizawl leh Zoram Medical College & Hospital chu Power & Electricity minister F Rodingliana leh Health & Family Welfare minister Lalrinpuii ten Inrinni khan tlawhin chhum lo chat loa power supply pe dan leh hmalakna tur hmachhawp dangte a hmunah an en.
Civil Hospital Aizawl chawmtu tur bik, dedicated power line siam hna thawh bul tan dan tur an en a, ruahman dan chuan Civil Hospital powerline hi direct-in Indoor Sub-Station atanga lak tur a ni a, hemi atan hian cheng vaibelchhe khat chuang ruahman a ni.
Power supply khaihlak thulha hospital pumpui chawm thei tur 500 kVA diesel generator dahna tur hmun pawh enho nghal a ni a. Diesel generator leina tur hi P&E department kutah sum pek tawh niin, bun fel thuai tum a ni. Hmun pawimawh zual- ICU, Blood Bank, Haemodialysis Unit leh operation theater chawmtu tur power back up keng tel 20 kVA solar plant dahna tur an en nghal bawk.
Zoram Medical College & Hospital-ah NESIDS b(OTRI) atanga sum hmuh vaibelchhe 13.14 senga 1.5 Mw solar plant dahna tur leh heta tanga kawlphetha siamchhuah ZMC chhunga semkualna tur km.1-a sei distribution line leh 500kVA distribution transformer thar pathum dah belh dan tur en a ni. ZMC-a solar plant dah tur 1.5 Mw atang hian 1.2 Mw hi on-grid tur niin, 3 Mw hi hybrid mode vuah tur a ni.
Minister-te hian kan damdawi in lian pahniha khaihlak lo (24X7) a power pe turin heng ruahmanna hi siam a ni tih an sawi a. A bikin hmun pawimawh zual – ICU, Blood Bank, Haemodialysis Unit leh OT chu thlur bing zual a ni dawn a, reiloteah hna thawh tan a ni dawn tih an sawi a ni.
Minister-te hi department pahnih hotuten an tawiawm a ni.