Afghanistan-a thleng ngai lo, hmeichhiate tel duh lohna lantirnaah mi pahnih thi

Afghanistan khawthlang lam khawpui, Herat-ah thil thleng zen zen lo thlengin Islamic dress code khauh tak bawhchhia nia puh hmeichhiate hren an nih duh lohna lantira pungkhawm a ni a, hnawh darh nan Taliban police-in silai an hmet puak tih hmutute leh a telten an sawi.
Damdawi ina thawkte chuan BBC hnenah mi pahnih an thi tih an sawi a; mahse, engtia thi nge tih erawh an sawi chiang lo va. Mi dang eng emaw zatin hliam an tuar bawk.
Tual chhung Taliban sorkar thuneituten ‘hijab hak dan dik lova ha’ nia ngaih hmeichhiate an man tan nia sawi a nih atanga ni eng emaw zatah duh lohna lantur hian hmeichhia leh mipa an pung khawm a ni.
Herat-a police-te chuan thi an awm lo an sawi ve thung a, pung khawmte erawh an chhang let ngei tih an pawm a. Officer-te chuan ‘himna dan leh vantlang thunun nan hma an la’ tih an sawi.
Police-te hi engtin nge an chet tih erawh hriat chian a ni lo va. Hmutute chuan police-te hian silai an hmet puak niin an sawi a, finfiahna erawh a awm lo.
Mipui zinga tel ve pakhat chuan AFP hnenah venhim hna thawktute chuan ‘pungkhawmte hnawh darh nan tiang, vuakna leh silai an hmang a. Van lam hawiin silai an hmet puak’ niin a sawi.
News agency hnenah hliam tuar a hmuh thu a sawi a. “Mipui hi an hlauthawng hle a ni,” a ti. AFP chuan thlalaktu pakhat chuan venhim hna thawktute hian ‘duh lohna lantirtute lam hawiin silai an kap’ a hmuh thu a sawi.
Thlalatu chuan, “Keimah ngeiin ka hmuh dan atanga chuan mi tam takin hliam an tuar a ni,” a ti.
Online-a video darh zingah pawh silai ri hriat theih a ni a, hmeichhiaten ‘vaw suh u’ tia au ri hriat theih a ni bawk.
Herat Police Command thupuangtu, Sayed Masoud Hosseini-a hian pung khawmte hi ‘vantlang boruak tichhe thei khawpin an che’ tih a sawi.
August, 2021-a Afghanistan-a thuneihna an chan leh hnuah Taliban-te laka nawrh huaihawt hi a tlem hle a, hmeichhiate phei chuan an ti lo tluk a ni.
Hijab inbel hi Taliban-ten dan tam tak an hman zinga pakhat a ni a, May, 2022 atang khan khauh taka kalpui tan a ni.