Spider-Man: Brand New Day trailer-in record siam Zendaya-i’n Tom Holland nena an inneih zungbun a bun chhuak
Spider-Man: Brand New Day trailer
Tom Holland leh Zendaya te inneih thuthar thang vel karah an film chan dunna tar ber ‘Spider-Man: Brand New Day’ trailer pawh an tichhuak leh ta a, he film thar hi July ni 31-a tlangzarh tur niin Sony leh Marvel chuan an tarlang. He film trailer hian darkar 24 chhunga movie trailer zinga online-a entu ngah ber record a rawn siam nghal.
2021 khan ‘Spider-Man: No Way Home’ an tlangzarh a, chumi hnua Spidey film an siam leh hmasak ber chu “Brand New Day’ hi niin, Peter Parker chu amah hretute nun atangin a inlahrang a, a inthupbo ta daih a, amah hre lotu te karah New York-ah thilsual titu te beiin a che zui zel a. Mahse, mipuiin Spider-Man an mamawhna a san tak zela chuan atan pawh pressure a sang ta hle a, chutiang karah chuan sualna chi dang, a la hmachhawn ngai reng reng loh, thil tihtheihna chak tak nei a hmachhawn a ngai ta.
He film tharah hian Zendaya, Jacob Batalon, Mark Ruffalo, Jon Bernthal leh Michael Mando te pawh an inlan leh a, anni bakah hian Sadie Sink, Tramell Tillman, Liza Colon-Zayas leh Marvin Jones II te pawhin an rawn zawm ve ta bawk.
Trailer-ah chuan Zendaya (MJ) pawhin ngaihzawng dang a lo nei tawh a, Peter Parker pawhin MJ chuan rilru dang a pu tawh tih te a hrechhuak a. Hei bakah hian Hulk pawh inlanin, Spider-Man nen pawh an inkar boruak tha vak tlat lo.
Spider-Man film trailer-te hian record an siam thei viau mai a, a film hmasa trailer-in vawi tluklehdingawn chuan en a hlawh thei a, movie trailer zinga hetiang kai thei hmasa ber a ni a, “No Way Home’ trailer khan March ni 17-ah an tlangzarh a, ni li chhungin vawi tluklehdingawn en a hlawh tlat. Tuna a film thar ber trailer pawh hian an tihchhuah atanga darkar 24 chhungin vawi maktaduai 718 chuang en a hlawh leh thei a, movie trailer zinga darkar 24 chhunga online view ngah ber record a rawn siam nghal der tawh a, ‘No Way Home’ khan darkar 24 chhungin vawi maktaduai 355.5 en a hlawh thei a, hei hi a rawn khum chiang viau a, chuvangin vawi tluklehdingawn view pawh hi a kai thuaiin a rinawm e.
Tom Holland-a’n Zendaya nen an inneih tawh thu a nemngheh hnu lawkah Zendaya pawhin pasal a nei tawh tih chhinchhiahna, an inneih zungbun langsar takin a bun chhuak ve ta nghal a, Amsterdam-a Spider-Man: Brand New Day photocall-ah a zungbun hi a langsar thei ang berin a bun ta vâng mai a ni.
Spider-Man film thar ber ‘Spider-Man: Brand New Day’ photocall hi Amsterdam-ah June ni 17 khan an nei a, Zendaya hian Toffany & Co. kutchhuak, inneih zungbun ‘Bird on a Rock’ a rawn bun chhuak a, Louis Vuitton kawr ngawng tung sang black & white tailcoat top leh pawnfen chhing sen bakah pheikhawk keartui sang var nen a induang zalh kawp mai. Holland pawh a nupui incheina nena inhmeh turin suit dum hlang a inbel a, ngawngawrh rawng sen, var leh pawl inpawlh a awrh bawk.