MJA member tan AI tangkaina tur inzirtir

Mizoram Journalists’ Association Gen. Hqrs. member-te tan an hnathawhna atana tunlai thiamna, artificial intelligence (AI) an hmang tangkai ve theih dan tur chu Zirtawpni khan an inzirtir a. Mizoram Journalist Welfare Scheme (MJWS) chungchang hriatchian ngai an inhrilhfiah bawk.
Workshop hawngtu MJA president Vanlalrema Vantawl chuan, AI chu mi tam takin an hman tangkai tawh avangin media khawvel pawh nasa takin a inthlak mek a, AI chu an hmelma a ni loa, an hna tiawlsamtu tur zawk a ni tih an hriat a, hnathawh tiawlsam atan an hman thiam a tul tih a sawi. Hetih rual hian AI chu zaa za a rin theih loh tih hria a, AI-a innghah lutuk chuan thluak a ti chawl thei a, rin dan tawk an thiam a ngai tih sawiin, anmahnia theihna leh thiamna tithuanawptu atan hman loh a tha tih a sawi.
AI chu journalism ethics leh mihring sulhnu (human touch) tibo thei khawpa khawl chak a nih avang journalist tan fimkhur a ngai zual a, naupang PhD nei, kaihhruai mamawh si angin ngai se, an tangkai pui ber a ring tih a sawi a ni.
Google company hnuaia AI leh a kaihhnawih lo zir tawh The Frontier Despatch editor Adam Saprinsanga’n MJA member-te hi AI hman dan leh a tangkaina hrang hrang a sawifiah a. A taka tihchhin nghal zel niin, zawhna awmte a chhang bawk.