Lucknow-a in kangah mi 15 thi
Lucknow-a in kangah mi 15 thi
Uttar Pradesh khawpui, Lucknow-a Aliganj huam chhunga in chhawng thuma sanga kangmei nasa tak chhuakah mi 15 an thi a, mi eng emaw zatin hliam an tuar bawk.
Thawhtanni chawhnua kangmei chhuahna in hi a sak leh hmanrua hmanah dan bawhchhiatna a awm nia sawi chu chhui chian zui mek a ni. Thuneitute chuan engtin nge chenna in atana tih hmuna sumdawnna leh zirna hmunte dahna a nih tih an chhui mek bawk.
Kangmei chhuak avang hian mi pali man nghal an ni tawh a, thuneitu pali an hna atanga chawlh lailawktir (suspend) an ni tawh bawk.
Lucknow hmar lam, Usha Mehta Marg-a in hi a tirah tak chuan chenna in atan hman phalna pek a ni a. Lucknow Development Authority (LDA) chhinchhiah dan leh Lucknow Municipal Corporation-in house tax document-a a lan danin building map hi sumdawnna atan ni lovin, in atana hman tura pawm a ni.
Chhuitute chuan unau – Virendra Prasad Shukla, Surendra Shukla leh Dhirendra Shukla te intawm in hi chenna in atana hman phalna dawng mah se sumdawnna hmunpuiah an chantir nia sawi a ni tih an hmu chhuak a. Thuneitute chuan sumdawnna atan hian kum 2014 atanga hman tan nia rin a nih thu an sawi.
Kangmei chhuah chhan hi hriat a la ni lo a, in chhungah mi tam tak an tang a, an zinga tam tak chu he hmuna animation center kalpui meka zirlaite an ni a. Mei hian in pum kangin thi tam zawk erawh chhawng hnihnaa mite an ni.
Chhui hna thawh hmasaah chuan himna tura tih ngai tam tak tih loh a awm tih tar lan a ni a, hei hian chhiatna nasa zawk a thlen phah thei nia ngaih a ni.
Chhuitute hian inah hian rikruma chhuahna (emergency exit) a awm lo niin an sawi a. In chung panna kawng pawh khar a nih thu an sawi a, in pumah meikhu leh meialh a darh avangin a chhunga awmte an tlanchhuak thei lo niin an sawi.
Thuneitute chuan in luhna pui ber, main entrance-a fel lo awmte pawh an hmuchhuak a. Chhuinaa tar lan danin office-a luhna chu kutzungpui nem hmanna a ni a, kangmei a chhuah khan hei hi a thawk tawh lo niin an sawi a, amaha inhawn leh kalh theihna pawh a tang a, a chhungah mi an tang ta niin an sawi.
He hmun hi a tir chuan kum 1980 khan lottery hmanga pek a ni a, kum 2005 khan Vijay Kumar leh Usha te duhsakna atan sale deed tihfel a ni a, hemi hma hian kum 2013 khan Virendra Pratap Shukla leh Surendra Pratap Shukla te hnenah hralh a ni a. Hemi hnu hian LDA chuan August 7, 2014 khan neitu tharte hnenah neitu nihna a pe leh a ni.
Square feet 1,992-a zau in hi August 20, 2014 khan chenna in atana siam phalna a dawng a; mahse, a hnuah thuneitute chuan kum 2016 khan he hmunah hian phalna nei lova sak a nih thu sawiin thubuai an siam tan a. May 10, 2016 khan thiah tura tihna thupek tihchhuah a ni a, thupek chu July 5, 2016 khan tihtawp a ni a, hei hi a neituten sawi vena remchang pek an ni lo va, in an sak dan tur duan pawm tawh anga an sak a nih thu an sawi vang a ni.
Tun tum thil thlengah hian Aliganj Police Station-ah thubuai ziah luh a ni a, chhui chian mek zel a la ni.