Manpower-a indaihlohnaah department tin endik ka tum: – Chief minister

Sawrkar department hrang hranga thawktu indaihlohna chuan hna a tih muan phah hle tih chief minister Lalduhoma chuan a sawi a. Hemi siamrem dan dap tur hian department tin dinhmun endik a tum tih a sawi.Tunhnaia adviser to chief minister TBC Lalvenchhunga’n hmasawnna hna a muan thu a sawi chhuah chungchanga thuthar thehdarhtute zawhna chhangin chief minister chuan, amah pawhin hna hi muang a ti a, a chhunga luhchilh erawh chuan duh ang ngawta tih chak theih a ni lo tih a hriatpui thu a sawi. Hna muan chhan ber chu thawktu indaihloh vang nia a hriat thu a sawi bawk.
“Kum tam tak chhung hnaruak hnawhkhah lohin a lo awm a, pension-a chhuak hmunruak hnawhkhat theih tur qualify pha an awm lohna pawh a awm. A huna promotion pek loh leh a huna hnawhkhah thin loh vang a ni. Hei hi department pumpuia endik ka tum mek,” a ti.
An sawrkar hnu ah sum harsa chung chungin hna sing chuan an hnawhkhat tawh a, chuti chung chuan an la indaih chuang lo tih a sawi a. e-file an introduce chuan hna tam takah manpower mamawhna ti tlahniam thei tura ngaih a ni na a, field worker an indaih lo lutuk a; han innnawr vak pawh ni se, department tinah hian hnaruak awm zat atanga an hnawhkhah theih hi a chanve pawh tling pha lo a tam hle tih a sawi.
Chief minister hian zawhna dang pawh a chhang a. A ministry-ah portfolio siksawi tul a ti lo tih sawiin, minister-te chu first timer an ni fur a, an department chan an hneh chho dawn tan chauh a, insiksawi tul tihna a nei lem lo tih a sawi. Chuti chung chuan, portfolio thlak a awm nual a, zo lo an tih deuh avanga a changtu minister lamin semzai deuh an duh vang zawk a ni deuh zel a, chumi kaihhnawiha insiksawi a la ni vek tih sawiin, DP&AR lak erawh a lar ta deuh a, pawnlam atanga opposition party-te chaw tui a nih tel deuh vang a ni ber tih a sawi a ni.
DP&AR chungchang hi ZPM Political Affairs Committee chuan kum 2024 atang khan a lo ngaihtuah tawh a, a tira an duh ber chu thawktu mal transfer chungchang a ni a. Hei hi tihhlawhtlin a nih loh avangin an ngaihtuah leh thin a, an duh dan hi kaltlangpui chu nise, tun ang hi a thleng loang tih a sawi.
“PAC hian palzut deuh leh rei lutuk deuha an hriat avangin, hun tiam an siam chhunga an duh anga thil a kal loh chuan chief minister-in la mai se, tih kha an thutlukna a ni. DP&AR chief minister-in chang se, tih hi a tira an thu leh hla a ni lo. Kei chu party mi, party siam ka ni a, party thu anga awm tur ka ni,” a ti.
Zirlai pawl an ni emaw NGO an ni emaw kohhran pawh, sawrkar hmalaknaa an inrawlhna chin an nei zel a, chutiangin party thuneitu sang pawhin a tul bikah chuan aw an chhuah thin tih Lalduhoma hian sawiin, “Hetah hian an inrawlh lo tur a ni a, hetah hian an inrawlh lo tur, tiin ramri kan va kham sak thei loa, party ngei pawh inrawlh tul an tihnaah an inrawlh a ni mai a, tul lo an tihnaah chuan an inrawlh chuang lo,” a ti.
NDA-ah ZPM a tel lo tih sawiin, Mizoramah Mizo Union hun atangin central-a sawrkar apiang an thawhpui mai a, Congress sawrkar lai pawhin Mizorama regional party chuan an zu zawm mai a, national party an rawn luh ve tak hnu hian thil a danglam a, central-a an party a sawrkar a, state-a an sawrkar ve si loh chuan, state-a sawrkar apiang kha opposition party tluk an ni ta zel tih a sawi.
Prime minister leh Union Home minister te pawhin tunhnai thlengin NDA-a tel turin an sawm tih Lalduhoma hian a sawi a. National thlir thleng pha regional party nih chu an dinna a ni tih 2023 MLA inthlan hmaa an interview-ah pawh a lo sawi tawh thin a, thawhhona tha tak neih an duhtawk a, state-ah chuan anmahni tluk an ni reng dawn tih a hrilh mai thin tih a sawi.
“NDA zawm tawh anga thu darh hi a dik loa, ZPM PAC meeting-ah pawh agenda-ah a la awm ngai lo hrim hrim,” a ti. Autonomous District Council ah erawh sawrkarna siam thei theiin an siam chu tunhma leh tunah pawh kalpui dan niin, ZPM pawhin Chakma ADC-ah BJP an thawhpui mai loh chuan, sawrkarna an siam thei lo ve ve a, an insuihrem mai a ngai tih a sawi a ni.