Aizawl Sahuana sakei enkawl dam

Aizawl Sahuana Keipui (Bengal Tiger) hliam chu Mizoram Forest department, Wildlife Institute of India leh AH & Vety department mithiam thawkho chuan an enkawl dam.
Aizawl Zoological Park director Margaret Lalramchhani sawi danin, kumin June ni 15 khan Sahuana sakei enkawltu chuan Bengal Tiger nu pakhat chu dan pangngai aia chaw a ei tlem avangin harsatna a neih a ring tih a report a; range officer leh biologist ten sakei taksa hi an enfiah hnuah a mei chung zawnah pawisa thir tiat vel hliam an hmu a, sakei hi a kawlh em avangin a hliam enchiang tur hian Mizoram AH & Vety department mithiamte leh sahuana veterinary field assistant (VFA) an pun a, a hliam hi a lung tih hmuchhuah a ni.
A hliam hi eng anga thuk nge tih hre turin Veterinary Sciences & Animal Husbandry College Selesih atangin a kah mutna an hawh a, June 18 khan kah mut an tum a, an damdawi neih hi a chak tawk loh avangin an kap mu zo lo. Muhil chiah lo, mutchhuak deuha a awm laiin, a hliama lung awm hi tihfai sakin, damdawi in an kap a, a chaw ei turah damdawi an telh bawk.
Vety doctor-te hian kar khat chhunga an lo enkawl tawhna chuan a hliam hi a lo tih dam hman viau tawh lain, a lo inhaina/inhiahna lamah a ketin pakhat a ti bung a, chu chuan hnai a la a. A theih ang angin an dressing a, antibiotic chak chi in an chiu a ni.
Mizorama ran damdawi neihte a chak tawk loh avang leh, hetiang ramsa enkawl thiam bik an awm loh avangin sakei hliam hi eng ang taka thuk nge tih hre turin Wildlife Institute of India puihna an dil a, June 24 khan wildlife doctor pahnih – Dr Lallianpuii Kawlni (scientist D) leh Dr Sanath Krishna Muliya (scientist C) an rawn tir a, an pahnih kaihhruaina hian June 25 khan sakei hi kap mu in, State Veterinary Hospital leh Forest Department atangin Dr Jonathan, Dr Lalchhanhima leh Dr Joan RC Lalremruati te bakah Aizawl Zoological Park director Margaret Lalramchhani, DFO (Extension) Lalruatfela, range officer Zohmingsanga leh sahuana thawkte nen minute 45 chhungin fimkhur leh uluk takin enkawl ngai ang hi hlawhtling takin an tifel a. Tun dinhmunah sakei hian hma a sawn a, a hmaa a thinchhiat ang em emin a thinchhe tawh lo nia an hria a, a hliam an enkawl chungchanga theihtawpa an puihnaah AH& Vety department director chungah an lawm hle tih Zoological Park director hian a sawi a ni.
Aizawl Sahuanah hian Bengal Tiger pathum – a nu pahnih leh a pa pakhat a awm a. Tuna sakei nu hliam an enkawl hi kum 9-a upa niin, Nandankanan Zoological Park Odisha atanga kum 2023-a an lak a ni.