CM tur Val Upa Council-in a ruat thin – Lalduhoma
Chief minister tur chu Val Upa Council-in a ruat thin a, Pathian hnenah rei tak chief minister tir turin a dil ngai lo tih chief minister Lalduhoma chuan a sawi.
Thawhtannia ZPM party office-a inkhawmah chief minister Lalduhoma chuan, Pathian hnenah rei tak CM nihna chanvo chelh tir turin a dil ngai loa, a aia tha zawk, tisa leh thlarau lama chak zawk pe turin a dil thin tih a sawi. “Hruaitu nih hi a chuha chuh chi a ni lo, amahin a lo piang mai. Kan party phei chuan danglam bikna kan nei a, chu chu Val Upa Council kan nei hi a ni. Chief minister tur hi Val Upa Council-in an ruat thin,” a ti.
Term chanve an sawrkar ta a, mi tam tak ngaihdanah chuan minister-te hna chanpual thlakthlengna lian tak thleng turah an ngai tih sawiin, minister-te an thawkrim a, an department chan an bel dawn chauh a, tun dinhmunah chuan major reshuffle ngai an ti lo tih a sawi. Chutih laiin central atanga thiltih ngai ang chi leh department inhnerem deuh tur chu tih danglam zeuh zeuh an nei a, minor reshuffle hi vawi 10 dawn lai an nei tawh a, a boruak azir zelin kalpui chhoh a ni dawn tih a sawi.
Kum tam tak chhung an policy an lo vahvaihpui tawh a, party mite thawhrimna leh mipui avanga sawrkar an ni tih Lalduhoma hian a sawi. Party mite chuan theihtawp chhuah a, sawrkar tuma hma lak chu an tih tur a nih laiin, Mizoram mipui nawlpuiin an duhsakna an hlan vanga sawrkar an ni tih an theihnghilh tur a ni lo tih sawiin, “Kan party hmingah pawh ‘People’s Movement’ kan nih angin, mipui nawlpui pen rual zela kal tur kan ni a, mipui pawh tunhma sawrkar ai khan keini-ah chuan an inti neitu em em a, mipui kan dah pawimawh hle tur a ni,” a ti.
Sawrkar a that leh that lohah eng tehfung nge hman tur, tia zawtin, “Kan thil dil a hlawhtlin chiah loh avanga sawrkar sawisel chiam mai kan ni em? Kan mimal duh dan leh hamthatna atanga kan teh chuan sawrkar hi teh tlin a har khawp ang. Kan auhla kan umzui em? MLA-te hnathawh a tha tawk em? tih hian teh ang u,” a ti.
Minister 12 an nei a, kum hnih leh a chanve chhung ram an la tawh chinah lungawithlak viau mah se, an chanpual department theuhah ram lak tur hmachhawp an la ngah hle tih chief minister hian a sawi. Corruption lakah, system chhe lutuk lakah, hnathawh quality chhe lutuk lakah ram lak tur an la ngah a. Chawl thei an la ni lo tih a sawi.