MNF hruaituten Remna Ni hmanpui

June 30 – Remna Ni chu MNF hruaituten hmun hrang hrangah an hmanpui.
Mizo Hnam Run Aizawla hmannaah MNF senior vice president Dr R Lalthangliana chuan, tuna Remna Ni an hman chu chawlhlawkna a ni a, ram changkang zawkte angin hnam hmangaihna tak tak thinlung nen ‘economics independent’ an sual leh mek tih a sawi.
Remna neihna atan kohhran, zirlai pawl, political party-ten theihtawp chhuahin, engkim chan huamin, Pathian hnathawh ropui tak a lo lang a; remna ziahah Mizo nationalism an tung tel loa; an tung tel ngai hek loang, tia sawiin, “Mahni kea ding thei turin kan intodelh a ngai a, Remna Ni lo thleng hi Mizoram tan kan hlan ve thei dawn em tih hi ka zawhna a ni,” a ti.
MNF senior vice president leh treasurer Lalruatkima chuan Thawhlehni zing khan Remna Run Luangmualah zalenna sual kum 60 tlin lawmna pualin thing an phun a. Col.Lalrawnliana lehkhabu ziah ‘Exodus Day leh Bangladesh War’ tih tlangzarh nghal a ni.
Mamita hmanpuitu MNF vice president Vanlalzawma chuan, MNF founder president Pu Laldenga’n ‘MNF lo chhuah chhan pakhat chu, kan awm loh hlanin Mizoramah Aron-a hoin Sebawng lem in lo chhungin in lo siam ang tih kan hlau a ni,’ a tih thu sawi chhawngin, MNF kha Mizoram hmangaihna avangin an lo chhuak tih a sawi.
“MNF kha kum 20 meuh hreawm tuarin ram tan an feh chhuak a, ramhnuaiah riltam tuihala an awmin ei tur an hmuhin, a hmutuin ei mai loin thiante nen a huhoin an ei tlang thin. Chu’ng zawng zawng chu ram leh hnam hmangaihna avangin an lo paltlang a, tunah thangtharte hian kha an inhmangaihna ang – aia upa zahna, kei kei ti loa, inhmangaih tlangin ram tan inhlan thar ila, kan hnam pasalthate hniakhnung zui turin thangtharten ke pen ang u,” a ti.
Thenzawlah Serchhip West Block MNF huaihawtin Remna Ni hman a ni a. Hmanpuitu MLA Er. H Lalzirliana chuan, remna kum 40 kan neih hnuah nationalism kan hriatthiam dan a lo danglam tawh a ni maithei, tiin, “Nationalism hi hnam a lo pianchhuahin a lo awm ngawt loa, India sawrkarin nasa taka min hrual avangin Mizo rilru na avanga rawn piang a ni,” a ti.
India ram chu kum 2047-ah develop country nih tumin hma a la mek a, chutiang chiah chuan Mizoram pawh ngaihtuahna thar nen nationalism an her rem a hun a, a neitu MNF-in hmanlai thil sawi reng loa an kalpui a hun tih a sawi. “Hnam anga movement kan neih chu tunlai hian sawi dal tuma theihtawpa bei an awm thin a. Hnam movement hi lo awm lo se, tuna kan dinhmun ang hi kan ding phak angem? Mizote khawvel hmuha min pho chhuaktu chu kan hnam movement hi a ni a, a neitu Mizo mipui hian hlut thiam ang u,” a ti.