Health minister thutkhawmah tel Mipui huap MUHCS a hlawhtling – Lalrinpuii

16th Conference of the Central Council Health & Family Welfare chu Thawhlehni khan New Delhi-ah neih a ni a. Mizoram Health minister Lalrinpuii chuan Mizoram mipui zawng zawng huap MUHCS hlawhtling taka kalpui chhoh a nih thu a sawi.
Health minister hian, Mizoram-in Sustainable Development Goals tihlawhtling tura hma a lakna kalzelah ‘neonatal mortality rate’ leh ‘under 5 mortality rate’ 9 leh 18 ah an tlathla tawh a, immunisation coverage pawh state data ang chuan 90% a ni a, non communicable disease chungchangah nasa taka inzirtir leh damdawi sem niin, TB rinhlelhawm x-ray hmanga endik tam lamah pawh ram pum huapa titha ber a ni tih a sawi.
Quality service pek kawngah Mizorama health facility 121-in NQAS certification an nei tawh a, Niti Ayog-in tehna hrang hrang a siam hmanga Aspirational District a endiknaah ‘Health & Nutrition sector’ ah Mamit district chuan ram puma titha pathumna a hauh a. Health facility zawng zawngah Ayushman Bharat Digital Mission hmalakna kalpui niin, Urban Wellness Centre-ah e-Sushrut Clinic System hman vek a ni a. Mirethei zawkte tan chauha sawrkar laipui siam ABPMJAY chu convergence-a kalpuiin, Mizoram mipui zawng zawng huapa state sawrkar-in MUHCS hlawhtling takin a kalpui chhoh tih a sawi bawk.
Union Health minister JP Nadda chuan, tunhma lama damlo enkawlna – curative lam chauh ngaihpawimawh thin chu preventive, curative, promotion, palliative leh rehabilitative lamah sawrkarin ke a pen a. India chuan zalenna a hmuh atanga kum 100 naah chuan ram intodelh (developed country) a nih theihnan Vikshit Bharat 2047 goal a siam a. He goal hi mipui an hrisel loh chuan tihhlawhtlin theih a nih loh avangin hriselna chu sawrkar ngaihpawimawh ber zing ami a ni reng dawn tih a sawi.
Health chu state subject a ni chungin, central leh state sawrkarin thawhhona tha zawk an neih loh chuan hmasawnna a khairual thei lo, tiin, sawrkar laipuiin ruahmanna a siam hrang hrang tihlawhtlingtu tak tak chu state sawrkar an nih avangin ram tana thawhpuiah Council member-te a sawm tih a sawi a ni.
Conference of the Central Council of H&FW hi Union Health minister kaihhruai state hrang hrang Health minister-te telna niin, health lama ram pum huap council sang ber a ni. India ram pum huapa hriselna lama hmalakna hrang hrang thlirho thin niin, hmasawnna tur kawng hrang hrang an rel thin.
Council meeting rual hian hriselna lama hmalakna atana tangkai – National Ambulance Service Guidelines, Suman Roadmap 2030, Samagra Shosu Bal Swasthya Karyakram, Anaemia Mukt Bharat Abhiyaan bakah Ayushman Bharat Digital Mission hnuaia hmalakna – Aarogya Setu 2.0, Ayushman app, Drug Registry, Unified Health Interface leh Sushrut Lite tlangzarh nghal a ni.