Dal theih loh France leh Mbappe

World Cup 2026 khelh mekah champion tura rinkai ber zinga mi France chuan nilai zing khan last 32 an khel a, an khingpui Sweden chu 3-0 ngawtin an sawp. France in an thatzia lantirin an khingpuite an hneh zel a. Kylian Mbappe pawhin World Cup-a player ropui a nihzia lantir zui zelin Sweden lakah goal hnih a thun a, World Cup-ah goal 18 a thun tling der tawh.
Last 32 kal kawng
World Cup 2018 ah champion a, 2022 final hmuhnawm zetah Argentina laka vanduai ta France hi World Cup 2026-a Group harsa zual zingah ngaih Group I-ah Norway, Senegal leh Iraq te nen an awm tlang. World Cup 2026-a an match hmasa berah team tha, mualchhunga Afcon champion Sengeal hmachhawnin fiahna hautak an hmachhawn nghal a. Team tha tak lakah 3-1 in hnehna an chang. An match hnihnaah awlsam takin Iraq an hneh a, Group match tawp berah Norway an hneh zui leh bawk.
France laka fiahna hautak hmachhawn Sweden hi Group F-ah Netherlands, Japan leh Tunisia te nen an awm tlang. Tunisia lakah 5-1 ngawta chakin bul an tan tha viau. Bul tan tha hle mah se an match hnihnaah Netherlands chu 5-1 ngawtin an hneh lo zui leh ta mai a, goal difference-ah 0 a ni leh nghal. An match hnuhnung berah Japan nen an inhnehtawk leh hram a, pathumna ni chungin last 32 an inhlangkai.
Sweden leh France te hi Europe khawmuala awm dun an ni bawk a vawi 23 zet an inhmachhawn tawh. France in vawi 12 hnehna an chang a, vawi 5 an inhnehtawk laiin Sweden in vawi 6 lai hnehna an lo chang tawh bawk. An record enin Sweden pawhin France hi an hlau bik lo.
Inkhel chu le
MetLife Stadium a mipui 80,663 zet pungkhawm hmaah France leh Sweden ten inkhel hmuhnawm an lantir. Sweden hian tlarhma player nei tha viau mah se France lakah risk an la ngam lova, attacking game khel lovin defensive game an khel. An innghahna chu phui taka an tlarhnung rem a, hun remchang an hmuh huna an khingpuite nawr let thut a ni.
Player nei tha zawk Didier Deschamps erawh chuan an theihna a hrechiang a, dim hlek lovin an khingpuite an nawr miah miah. Game a chungnungin, ball chang tam viau mah se France in goal an thun thei lawk lova, goal thun turin rin aia rei an nghak. Beisei anga goal an thun lawk theih loh hnuin France chuan chawlhlawk hmain goal an thun ta nge nge. Tlarhmaa player hlauhawm bik Kylian Mbappe chuan minute 45-naah Ousmane Dembele siamsak atangin goal a thun ta nge nge a, 1-0 a hmahruai chungin chawlhlawk an hmang.
Chawlhlawk hnu lamah France an khel tha leh zual a, goal pawh an thun belh leh thuai. Second half tan tirh lam minute 53-naah khel tha tak Bradley Barcola chuan Michael Olise siamsak tha tak chu goal-ah a chantir a, an goal hnihna thunin, Sweden laka an hmahruaina a tizau.
2-0 a hma an hruai hnuin France an khel tha zui zel a, an midfield khawng tak leh an tlarhnung inrem phui tak mai chu Sweden tan thiah theih rual a ni lo. Tlarhma player nei tha Sweden hian goal thun theihna hun tha zei ve zauh mah se an chhawr tangkai zo lo thung. Sweden in an hun tha neih an chhawr tangkai thei loh laiin France bawk an che fuh zui leh a. Goal hmahruai thuntu Kylian Mbappe chuan Olise siamsak atangin minute 74-naah an goal lina a thun a, an chakna a nemnghet. Mbappe goal thun hnu hian goal dang a luh belh thei tawh lova, France chuan Sweden lakah 3-0 a hnehna changin last 16 an inhlangkai a, Paraguay an hmachhawn zui leh dawn.
Sweden lakah France tlarhma player te an hmuhnawm tak zet a, dan rual an ni lo. Mbappe-a’n goal hnih a thun a, Bradley Barcola-a’ goal khat a thun bawk, Goal thun lo mah se a laia tlan Michael Olise a hmuhnawm em em a, assist vawi hnih lai a nei nghe nghe. A sirah a tlan hnua hmuhnawm lehzual Dembele pawh a khel tha leh viau a, goal thun em lo mah se assist vawi khat a nei tho bawk. France tlarhma zet hi zawng tu team tan pawh dan an awlai dawn hauh lo.
World Cup ngamtu Mbappe
Goal thun thei Kylian Mbappe zet hi chuan World Cup a ngam a, World Cup hi atan an awlsam bik riauin a lang. World Cup-ah match 18 atanga goal 18 lai thun thei a ni a, Lionel Messi nen World Cup-a goal thun tam ber nih tumin an intlansiak mek.
Ball thiam, tlan chak leh finishing tawih em em Kylian Mbappe hian kum 19 mi lek ni chungin World Cup a hmachhawn tan a. World Cup a hmachhawn hmasak ber 2018-ah champion nghalin, rawlthar tha berah thlan a ni nghe nghe. World Cup 2022-ah a chetha zui viau a, final-ah vanduai zawk ni bawk mah se goal 8 lai a thun a, Golden Boot a dawng tho thung. World Cup 2026 a lo inherchhuak a, khelh li atanga goal 6 thungin top-scorer an ni leh der tawh.
Mbappe hian World Cup knockout stage-ah goal 10 lai a thun a, World Cup knock-out stage-ah bik goal thun tam ber a ni.