Eco & Stats building satu leh a viltu department laka action lak an rawt

Economics & Statistics directorate building sak dan him tawk lo chungchangah a viltu sawrkar department leh a satu contractor lakah thuneituten a tul angin hma la ngei se an duh tih State Project Monitoring Committee chuan an sawi.
Mizoram sawrkarin hmasawnna ruhrel din tawh leh din mek endiktu atana a din Mizoram State Project Monitoring Committee (MSPMC) chuan cheng nuai 203 senga he building tih chak hna thawh that a ngaih chhan a chhuichiang a. A report-ah chuan, building ban hian concrete chak zawng tur ‘M20’ a phak lo nasa hle a, M10 grade hnuailam vek a ni a, he building hi a chakloin a derthawng hle tih a entir tih a sawi.
Building him loh chhan a sawinaah, “He building sak lai hian hmanrua leh a sak danah contractor an inthlahdahin hnathawh dan dik leh specification tling turin hna an thawk tha tawk lo ni berin a lang. He thil hi a namai loa, contractor hian design & specification ang ngeiin hna hi a tir atanga a tawp thlengin a thawk lo tih phat rual a ni lo. Endik pawh a ni lo tih a entir,” a ti.
“Lirnghing tamna ram Seismic Zone-5 ni thin Zone-6 a hlan kai ni ta dinhmun enin, he building a tlu sawp hman lo hi a mak viau. Siamthat ni ta lo se he building hi tlu sawp thei a ni,” a ti bawk.
MSPMC hian, specification zawm loa RCC grade hniam leh chak lo taka sak a nih dan hi Technical Inspection Report leh Audit remarks atangin chiang taka nemngheh a ni tih sawiin, contractor-in a hna tha lo thawh that tir leh theih hun chung, defect liability period a liam tawh a. He building project atan hian hna tling lo takin public sum tam tak luanral tir a nih bakah a thawm that lehna atan sum tam tak bawk sen ral leh mek a ni tih a sawi.
“Hei hi thil namnul theih loh a ni a. Sawrkar department lam chanah endik leh vil kawnga tih tur mawhphurhna tih a nih loh zia a langsar em em a. Mahni hna leh mawhphurhna ngaihthah (negligence) a nih avangin ‘disciplinary proceeding’ kalpui ngei a tul thei ang. He hna thawktu contractor chungah pawh a tul anga hremna dan lek ngei a tul ang. He case hi sawrkar thuneitute hian umzui ngei se, thil dik lo a awmzia finfiahna (evidence) zawng zawng awm vek tawh a ni,” tiin MSPMC zirchianna report hi rawtna a siam a ni.
ZPM Thalai Hqrs. hruaitute chuan, MSPMC inspection neihnaa an thil hmuhchhuahah, building a him loh chhan leh thuamthat ngai a nih tak chungchangah he building satu NECS leh a neitu MLA Pu Robert Romawia Royte chu a mawhphurtu lu ber an ni tih a chiang hle ah an ngai tih an sawi.
Kum 2022 khan a building chak loh dan leh a him tawk loh dan hi PWD chuan rebound hammer hmangin non- destructive test an nei atangin an lo hmuchhuak tawh a, thawm that tura an rawtna chu bawhzui a ni lo tih ZPM Thalai chuan an sawi. PWD bakah hian Aizawl DC kaihhruaia Aizawl District Disater Management Authority leh a kaihhnawih department aiawhten joint inspection an neihah pawh building a him tawk loh dan an report tawh tih a sawi a. Accountant General audit report atangin building sak hna inpek dan leh bill inpek danah dan zawm tur zawm loh, corruption nia lang a awm tih a sawi bawk.
“Hetiang khawpa him tawh lo, MNF sawrkarin a thuam tha thuai lo kha mak kan ti a, he building hi khatih laia MNF sawrkara minister Pu Robert Romawia Royte sak a nih vang leh, MNF sawrkar hian an minister pakhat hmingchhe mai tur thupna atan hma hi an la thuai loah kan ngai a, mipui himna aia minister pakhat hmingchhiat thup an thlang zawk hi ‘ram leh hnam hmelma’ ah kan ngai,” ZPM Thalai vice president Isaac Lallungawia Rokhum chuan a ti a. Khatihlaia Congress sawrkarin hetiang taka felfai loa NECS hnena hna a lo pe chu mantang eitu an awm hial an ring tih a sawi a ni.