DBBA Season Opening 2026: Quarter Finals Zan Khatna
Aizawl District Basketball Association (ADBBA) buatsaih season opening chu zanin hian quarter finals khelh tan a ni dawn ta.
Inkhel hmasa zawkah hian champion tura rinkai ni phak, Bawngkawn Horns 61 – 68 a hnehtu D3 BC Kulikawn chuan rawlthar beiseiawm rual kawltu Leitan Titans 56 – 63 a hnehtu DGBC an hmawchhawn ang. He inkhela chak zawk hian champion an sawi ri ngam zui tawh bawk ang.
Inkhel hnuhnung zawkah hian URBC 63 – 81 zeta sawp thei Zotlang BC ten an khel dawn bawk. Zotlang BC lamah hian Mizoram Super League ( MSL) lamah pawh star player lo ni phak hial tawh thin Rinchhana a awm a, ani hi chakpui tham thiamna leh theihna nei a ni.
Zotlang BC hmachhawn tur hi Khatla TBL Jr. an ni a, anni hian quarter finals lut tur hian 54 – 41 in Ramthar Hollow BBSP an paltlang bawk. Khatla TBL Jr. hi an senior team te MSL champion lai an ni a, club insawhnghet tawh sa hian a sang thei ang ber thlen an tum dawn tih a chiang.
Hoops Mania Timeout
Boruak ngam vang hrim hrim leh tan chhan nei lem lo va mahni ngaihtuahna phak piah lama thil thleng hrim hrim leh association hmalakna sawi pawr satliah thin erawh an kiam z el ta! Chutih rualin, ADBBA lam tan hian a pawp lai hnawh phui tur an thawhhona tha tak karah a la awm cheu.
Tournament pakhatah player ni bawk, coach ni tel cheu, chutah match official lama inzep tel hi Mizoram basketball hun hmasa lamah khan mihring indaih lohna avangin an awm thin! Chu mai a ni lo, tournament buatsaihtu te ngei ngei pawhin anmahni team ngeite inelna ah an tel tir deuh zel thin a nih kha – hei hi tun thlenga kalphung nghet a la ni zui ta zel!
Hun a liam duak duak a, tualchhung basketball in nasa takin hma a sawn mek karah hun liam taa thil thleng ang chi tho kha a thlen chhunzawm – player anga khel leh match official nikawp an awm, hei hi than zelna tur kawngah a pawi ang em?
Hemi chungchang hi rilru zau halhin ADBBA lam hian ngun leh zual zawkin ngaihtuah se a duhawm khawp mai. Heng kan sawi mek lai hian ‘fair’ takin, awn lam nei lem lo tan erawh chuan mihring indaih lohna karah hian a tih pawlh nawk nawk theih – engtik lai pawhin tun anga kan kal reng chuan sawisel tur tingin kawngkapui zau tak erawhin a inhawng thung!
Kan thu khar nan, ADBBA technical secretary (referee) Mawitea chuan, “Fair lohna a awm pawh ka hre lo. Referee-puite player/coach a an awmin, mi dang hian in tan angah min ngai thin a, hetiang hi chu a awm lem lo!” tiin The Aizawl Post Hoops Mania in match official-te coach leh player anga an awm tel chungchangah a mimal ngaihdan kan zawhna min chhang a ni.
Zanina inkhel turte:
D3 BC Kulikawn vs DGBC 6:30 pm
Zotlang BC vs Khatla TBL Jr. 8:00 pm