LMC-in Lungleia parking fee a hmuh mipui tan hmang let vek

Lunglei Municipal Council-in 2024-2025 kum atanga Lunglei khawpui chhunga parking fee khawn a lak hnu ah kumin June thleng khan cheng nuai 30 chuang a khawn chhuak tawh a. Hemi atanga sum a hmuh zawng zawng hi mipui tan hman let a ni.
Lunglei Municipal Council (LMC) hotuten thuthar thehdarhtute an hrilh danin, Lunglei khawpui chhunga lirthei chetvel dan leh hun dan, traffic leh vehicle parking chungchanga hma lak an tum dan an sawi a. LMC-in lirthei hun man (parking fee) a khawn chhuahte chu phal lohna hmuna lirthei hung leh riah vilvengtu tur Traffic Warden rawihna atan leh khawpui chhunga thirhrui (cable) inthlung hnawk chinfelna atan hman a ni dawn tih an sawi.
LMC chairman Lalzuithanga chuan, Lungleia lirthei hunna felfai leh mipui tana himna kawngah ruahmanna a siam thin a, lirthei dahna (garage) nei lo chu garage siamnan kumin September 30 thleng hun an pe tih a sawi. Local Council-te nen thawh hona tur inremna an siam chu a tawp tak avangin, hmalakna thar an ruahman thu sawiin, mipui harsatna hrethiam chungin ruahmanna an siam tih a sawi.
Traffic management leh parking lam enkawltu, LMC vice chairman K Lalrinawma sawi danin, Lunglei khawpuiah hian 2023- 2024 khan state sawrkar district transport officer enkawlna in parking fee Rs. 2,99,944 an khawn chhuak a, 2024– 2025 ah LMC hian khawn tanin, Rs. 13,45,255 an khawn chhuak. Kum 2025- 2026 ah Rs. 14,97,925 khawn chhuakin, kum kal mek, 2026- 2027 June thleng khan Rs. 8,53,464 khawn a ni tawh. Parking fee tlingkhawm hi LMC BoC-in a rel angin a bo a bang awm loin mipui tan hman zel a ni.
Parking fee tlingkhawm hmanna tur ruahmanna an siam chu sawiho a ni a. Vengchhung inkalpawhna kawng (internal road) sir leh phal lohna hmuna lirthei hung vil veng turin Traffic Warden rawih an ni dawn tih a sawi a. Lunglei SP kaihhruaiin training pek a ni tawh a, August atang chuan an thawh tan theih an beisei thu a sawi.
Lunglei khawpuia thirhrui (cable) inthlung hnawkte thenfaina atan parking fee an khawn khawmte chu hman a ni dawn tih sawiin, hemi kawnga hma lakna tur hi Traffic and Transport Co-ordination Committee-in ruahmanna a siam dawn tih a sawi.