Vietnam lawng chesuala thite India thlenpui

Vietnam-a lawng chesuala Indian thite ruang chu Thawhlehni khan Vietnam Airlines thlawhna VN979-in Mumbai phurh thlen a ni.
Chhatrapati Shivaji Maharaj International Airport an thlen hnuah ruangte hi state sorkar kaihhnawihte nena inbe rawnin an khua theuhvah phurh leh a ni.
Ruangte hi Chennai, Hyderabad, Thiruvananthapuram, leh Coimbatore telin ram chhung hmun hrang hrangah thawn chhuah a ni hlawm.
Hemi hma hian Thawhtanni khan Indian Embassy chuan Indian 15 ruang hi Vietnam Airlines thlawhna hmangin Ho Chi Minh City atangin an chhuak tih a lo puang tawh a ni.
State sorkar hrang hrangte chu hriattir an nih tawh thu sawiin ruangte chu an tum ram thlenga kalpui dan tur ruahmanna siam turin a ngen a. Ho Chi Minh City-a embassy leh consulate general chuan Phu Quoc Special Economic Zone, An Giang Province thuneitute, Ho Chi Minh City-a Department of Foreign Affairs, Vietnam Ministry of Foreign Affairs leh agency dangte chungah lawmthu an sawi bawk.
Ruangte hi Inrinnia Vietnam-a Phu Quoc Island bula Hon May Rut Ngoai Island bula lawng chesuala thite an ni a. Khualzin mi 36 phur tourist speedboat-ah hian Indian 32 leh Vietnamese thawktu mi pali an chuang a ni.
Vietnamese thuneitute chuan Ocean Pearl Island Company enkawl lawng hian Hon May Rut Islet atangin Phu Quoc Airport atanga kilometre 25 vela hla, An Thoi Port panin khualzinte a phur a, khaw awm danin a zir loh avangin a talbuai a, a chuangte zawng zawng tuiah an pil vek a ni.
A bul hnaia khualzin lawngte chu rei lo te chhunga thlengin chhanchhuah hna thawktute nen a chuang zawng zawngte hi vau kamah an la chhuak vek thei a. Lawnga chuang mi 36 zingah mi 21 an dam chhuak a, 15 an thi a ni.
Thi zinga 10 chu Tamil Nadu-a mi an ni a, Andhra Pradesh mi pathum leh Keralam mi pahnih an tel.
Chhiatna thlen hnu hian Indian mission chu Vietnam thuneitute nen thawkdunin thite finfiahna, ehkha pawimawh leh tihfel ngaite tihfel a nih rualin dam chhuakte leh an chhungte puihna an pe bawk.
Embassy chuan hliam na deuh tur Indian pakhat chu Phu Quoc atangin Ho Chi Minh City-a damdawi inah enkawlna tha zawk dawng tura sawn a ni.