Khupa balloon chep bet chunga kal chak thei ber

Khupa balloon chep bet chunga kal chak thei ber
Guinness World Record a ni ve tlat, mahse, han ti ve dawn chhin teh, a harsat dan i hrethiam mai ang. A nih loh pawhin record i lo siam ve reng thei asin! I khup pahnih inkarah balloon dah la, chu chu i khup chuan chep bet la, balloon titla lovin engtia thui nge i kal theih le!
Chicago a cheng Sam Farber, kum 25, chuan a khupa balloon chep bet chungin, balloon titla miah lovin meter 10 a thui kalpui thei a, second 3.5 chhungin a thleng hman. Farber hian khupa balloon chep bet chunga meter 10 kal thleng rang ber record siam a tum a ni.
Khupa balloon chep bet chunga meter 10 kal thleng rang ber record dinglai chu nikum November thlaa Swedish TV host Rckard Sjoberg siam niin, second 3.91 chhungin a thleng hman a, he record hi Sam Farber hian a rawn khum ta a ni. Mahse, Farber-a record siam hi Guinness World Records lamin an pawmpuina an la tichhuak lo va, an endik hnuah official-a puan leh tur a la ni ang.