Indian Navy hnenah MH-60R Seahawk helicopter hlan

Ram venhimna kawnga India-US thawhhona kal zelah Indian Navy kutah MH-60R Seahawk naval helicopter hlan a ni leh ta.
US Ambassador to India Sergio Gor-a chuan India-US thawhhona tan ‘chanchin thar phurhawm tak’ a nih thu sawiin hmanraw changkang hi Indo-Pacific tuipui himna atan a pawimawh tak zet dawn tih a sawi.
Lockheed Martin duan, MH-60R Seahawk hi kar hmasa khan Kochi-ah Indian Navy hnenah hlan niin tun kar tawpah hian helicopter pahnih dang pawh a thleng leh dawn tih India-a US embassy chuan Zirtawpni khan a sawi.
Kum 2020 khan India hian US chu MH-60R Seahawk helicopter 24 leisakna turin Foreign Military Sales (FMS) programme hnuaiah inremna a siampui a, Indian Navy-a helicopter fleet tihchangtlunna tura tih a ni.
Indian Navy chuan kawng chi hrang hranga hman theih helicopter hi March, 2024 khan INS Garuda, Kochi-ah a lo hmang tan tawh.
December, 2025 khan India hian inremna dang siampui lehin hei hi hun rei tak thlenga enkawlna, hmun sang zawka hman theih tur leh kil hrang hrang a thlawh theihna tura puihna tur a ni.
Defence ministry chuan helicopter a dawnte enkawl zuina tur inremna bik atan hian Rs. vaibelchhe 7,995 hu inremna a siam niin a sawi a ni.
MH-60R Seahawk hi tuipuia hman chi helicopter niin tuipuia beihpui thlakna kawng hrang hranga che chhuak thei tura duan a ni.
Tuihnuailawng beihna atan te, khawmual atanga beihna lo dan let nan te, tuipui thlithlai nan te, mi zawn leh chhanchhuah hna thawh nan te leh damdawi thila inthiar chhuah nan te a hman theih a. Lawng chi hrang – aircraft carrier, destroyer leh frigate-a phurh theih leh heng atanga awlsam taka thlawk chhuah thei a ni.
Indian Navy hian tuihnuailawng awm hnai hmuh awlsam nan te, tuipuia hmun pawimawh vil nan te, lawng beitu lo dan nan leh Indian Ocean-a hlauhawm awm thei apiang lo do let nan te a hmang thei ang.
Helicopter hi dipping sonar, sonobuoy, multi-mode radar, tuihnuailawng beih nan Mk-54 lightweight torpedo leh tun lai thiamnaa thuam hmanraw hrang hrang keng tel a ni.
Khawmuala chet nan AGM-114 Hellfire missile, lightweight torpedo leh machine gun a keng thei a, sophisticated radar leh electro-optical targeting system nena thuam a ni bawk.
‘Romeo’ tia an sawi thin MH-60R hi US Navy leh an thawhpui ram dang tam takin an hmang a. Indona atan bakah thil tul thlithlai, mi puihna, mi zawn leh chhanchhuahna leh damdawi thila inphurh kualna atan an hmang a. Tun lai khawvela naval helicopter daihzai ber pakhata ngaih a ni.