Jubilee pualin Gorkha thalai hnatlang

Mizoram Gorkha Youth Association (Central) chuan an pawl kum 50 tlin lawmna kalzelah Inrinni khan Aizawl veng 12 leh district khawpui 3 bakah Vairengte-ah Faina Beihpui hnatlang an huaihawt a, heng hnatlangah hian MGYA member 600 chuang an thawkchhuak.
Aizawl khawpui chhunga MGYA Branch 12 chuan Aizawl kawngpui engemawzat – Zotlang- Vaivakawn kawngdung, Jail Veng- Vanapa Hall kawngdung, Bawngkawn Main Road, Bawngkawn to Durtlang Raod, Dinthar- Vaivakawn Road leh kawngdung dang 10 chuangah bawlhhlawh thianfaiin kawngdung an tifai a. Lunglei, Siaha, Kolasib, Bualpui leh Vairengte-a MGYA Branch pawhin an khawpuiah theuh faina beihpui thlakin an hnatlang bawk.
MGYA hi Mizorama Gorkha pawl lian ber niin kum 1976-a din a ni a, member 5000 vel an awm mek. Kumin August 18 khian Golden Jubilee lawm tumin an inbuatsaih a, tuna faina hnatlang hi he an kum 50-na tlin lawmna peng pakhat a ni.