Mizotaxi app-ah sang chuang inziak lut tawh

July ni 1 atangin Aizawlah Mizotaxi app hman tur a ni a, mahse taxi-pute an la inziak lut tlem hle. Mi 1100 chuang an la ni chauh.
July ni 17, kar hmasa Zirtawpni thleng khan he app hmang tur hian taxi-pu 1165 an inziak lut tawh.
Mizotaxi app hi four wheeler taxi, two wheeler taxi leh autorickshaw te hman tura tih a ni a, State Transport Authority thurel a ni.
An chhinchhiah danin, kar hmasa Zirtawpni thleng khan four wheeler taxi 335 an inziak lut tawh a, two wheeler taxi 812 leh autorickshaw 18 an inziak lut tawh.
Inziah luh (registration) dilte zingah 133 chu an hnawl a, hei hi lirthei leh a khalhtute document fel loh vang a ni tih thu dawn a ni.
Mipui lamah mi 21413-in Mizotaxi app hman tumin an download tawh a, mahse lirthei lam an inziah luh tlem avangin he app hmanga lirthei book chungchangah pawh harsatna a awm tih thu dawn a ni.
Taxi leh autorickshaw khalhtu tam zawk chuan he app hi hman an tum rih lo niin a lang a, court-a khin pawh an tum mek.
Taxi khalhtute chuan anmahni hmangtuteah (passenger) pawh app hmang thiam lo tur, he app hi hmang lo tura ngen an awm thin tih an sawi.
Mizotaxi app hian a tir atangin ngaihven a hlawh a, inhnialna pawh a hring chhuak nghal. Politics-a inbeihna a tling zui a, chutiang karah chuan hman tan a ni. Mahse July chawhma lam la la atangin a thawm hi a zawi telh telh a, a tir lam angin tunah chuan sawi leh khel a hlawh vak tawh lo.