Ramri chungchangah Mizoram leh Tripura inbe dawn

Ramri chungchangah thla tharah hian Mizoram leh Tripura an inbe dawn a, Tripura sorkar lamin an sawi danin, August chawlhkar khatnaah state pahnih aiawhte Agartala-ah an inbe dawn a ni.
Tripura sorkar lam atanga thu an dawn, sap tawng chanchinbu lama a lan danin, Tripura chief minister Manik Saha hmalaknain state pahnih aiawhte hi an inbe dawn a, state pahnihte home secretary ve ve an inbe dawn a ni.
Tripura lamah hian an home secretary bakah an revenue secretary a tel ang a, North Tripura district-a an district magistrate a tel bawk ang.
NEC meeting hnuhnung berah khan hun remchangah chuhin Tripura chief minister leh Mizoram chief minister te’n ramri chungchang hi an sawi a, inbiak tha an tih thu an sawite bawhzuiin Tripura chief minister-in hma a la zui niin sap tawng chanchinbu lamah chuan an ziak.
Agartala-a an inbiak turah hian ramri chungchangah harsatna te bakah law and order lama thawhho dan tur te pawh an sawi dawn a ni.
Mizoram leh Tripura hian ramri chungchang hun engemaw chen chu harsatna an lo nei tawh a, state pahnih hian ram inchuh an nei nual. Thaidawr tlang pawh Mizoramin Mizoram chhunga mi-ah a ngaih laiin Tripura chuan an state-a tlang sang berah an chhal.
Thaidawr tlang chungchangah pawh hian thawm a awm fo a, Tripura lam atangin mandir sak tumna a awm fo. Mandir sak tum a nih hian Zampui tlanga Zofate’n an dodal thin.
2021-a ramri chungchanga Mizoram leh Assam an buai lai pawh khan Mizoram leh Tripura hian ramri chungchangah thu inhmu lo an nei a, chung lai chuan Mamit DC chuan Thaidawr tlangah hian mi panga aia tam punkhawm a lo khap tawh.
Phuldungsei pawh Mizoram leh Tripura hian an inchuh reng a, Phuldungsei mipuiin Mizoram ration card neih an duh thu pawh Mizoramah titi a lo tling tawh thin.